சமூக வலைதளங்களுக்கு தடை.. போராட்டத்தில் 19 பேர் பலி.. நேபாளத்தை அதிர வைத்த இளம் தலைமுறையினர்! | உலகம்

நேபாளத்தில் 17 ஆண்டுகளுக்கு முன்பு கடந்த 2008-ல் மன்னராட்சிக்கு முடிவு கட்டப்பட்டு, மக்களாட்சி மலர்ந்தது. தற்போது, அங்கு பிரதமர் கே.பி.சர்மா ஒலி தமையிலான அரசு ஆட்சில் உள்ளது. அண்மையில் அந்நாட்டில் தொலைத் தொடர்பு மற்றும் தகவல் தொழில்நுட்பத் துறையில் புதிய கட்டுப்பாடுகள் விதிக்க அந்நாட்டு அரசு திட்டமிட்டது. அதன்படி, சமூக வலைதள நிறுவனங்கள் 7 நாட்களுக்குள் பதிவு செய்ய வேண்டும் என்று கடந்த ஆகஸ்ட் 28 ஆம் தேதி கெடு விதித்தது. அரசு விதித்த கெடு முடிந்தும் பதிவு செய்யாத ஃபேஸ்புக், இன்ஸ்டகிராம், எக்ஸ் தளம், யூடியூப் உட்பட 26 சமூக வலைதளங்களுக்கு தடை விதிக்கப்பட்டுள்ளது.

ஆனால், ஆளும் அரசு மீதான ஊழல் குற்றச்சாட்டுகளை மூடி மறைக்கும் வகையில் சமூக வலைதளங்களுக்கு தடை விதித்துள்ளதாக குற்றம் சாட்டப்பட்டுள்ளது. இதனால், சமூக வலைதளங்களுக்கான தடையை நீக்க கோரி நேபாளம் முழுவதும் கடும் கண்டனக் குரல் எழுந்துள்ளது. இதன் ஒரு பகுதியாக ‘GEN Z’ புரட்சி என்ற பெயரில் தலைநகர் காத்மாண்டு உட்பட பல்வேறு நகரங்களில் இளைஞர்கள் தன்னெழுச்சியாக வீதியில் இறங்கி போராட்டத்தில் ஈடுபட்டுள்ளனர். காத்மாண்டுவில் உள்ள நாடாளுமன்றத்தை நோக்கி ஆயிரக்கணக்கானோர் பேரணியாக சென்றதை கண்டு, தலைநகரமே குலுங்கியது.

தொடர்ந்து போராட்டக்காரர்களை நோக்கி ரப்பர் குண்டுகள் பாய்ந்தன. ஒரு கட்டத்தில் வன்முறை வெடித்து காத்மாண்டு நகரமே போர்க்களமாக மாறியது. அப்போது, ஆங்காங்கே துப்பாக்கி சூடு நடத்தப்பட்டுள்ளது. இதில், 10-க்கும் மேற்பட்டோர் உயிரிழந்ததாகவும், 80-க்கும் மேற்பட்டோர் காயம் அடைந்ததாகவும் கூறப்படுகிறது. காயமடைந்தவர்களில் சிலரின் நிலை கவலைக்கிடமாக உள்ளதால் பலி எண்ணிக்கு அதிகரிக்க கூடும் எனவும் அஞ்சப்படுகிறது. இதனிடையே, புட்வால் (Butwal) நகரிலும், அரசுக்கு எதிராக நடைபெற்ற பிரமாண்ட பேரணியில் ஆயிரக்கணக்கான இளைஞர்கள் கலந்துகொண்டனர். அப்போது, அரசுக்கும், பிரதமர் சர்மா ஒலிக்கும் எதிராகவும் முழக்கமிட்டனர். தலைநகர் காத்மாண்டுவில் GEN Z போராட்டத்தால் அசாதாரண சூழல் ஏற்பட்டதால் ஊரடங்கு உத்தரவு அமல்படுத்தப்பட்டு உள்ளது.