தொடர் உச்சத்தில் இருந்த தங்கம் விலை.. திடீர் சரிவை சந்தித்துள்ளது!

அமெரிக்காவில் ஒரு அவுன்ஸ் தங்கத்தின் விலை 3,357.40 டாலராக இருந்தது. இந்நிலையில் வியாழன் காலை 8.58 மணிக்கு அதன் மதிப்பில் 0.5% சரிந்து ஒரு அவுன்ஸ் தங்கத்தின் விலை 3,326.51 டாலராக குறைந்தது.

இது குறித்து கருத்து தெரிவித்த சுயாதீன வர்த்தகரான தாய் வோங், “சந்தையில், நீண்ட வார இறுதி நாள் வருவதாலும், இந்த வாரம் முழுக்க தங்கம் விலை ஏறியே வந்ததாலும், இந்த சரிவு ஏற்பட்டிருக்கலாம். வார இறுதியில் சில வர்த்தக ஒப்பந்தங்கள் அறிவிக்கப்பட இருக்கின்றன. குறிப்பாக ஜப்பானுடனான வர்த்தக அறிவிப்பு வர வாய்ப்பு உள்ளது” எனத் தெரிவித்துள்ளார்.

முன்னதாக புதன்கிழமை அமெரிக்க அதிபர் டொனால்ட் டிரம்ப், முக்கியமான கனிம இறக்குமதி, மருந்துகள் மற்றும் இறக்குமதி செய்யப்படும் சிப்கள் ஆகியவற்றின் மீது சாத்தியமான கட்டணங்கள் குறித்து விசாரணை நடத்த உத்தரவிட்டிருந்தார்.

இதற்கிடையில், உலகளாவிய இறக்குமதிகள் மீதான வரிகளால் சந்தையில் ஏற்பட்ட மாற்றங்களைத் தொடர்ந்து நேரடி பேச்சுவார்த்தைகள் நடைபெற்று வருகின்றன. அந்த வகையில், ஜப்பானுடன் நடந்த முதற்கட்ட பேச்சுவார்த்தையில் முன்னேற்றம் இருந்ததாக அதிபர் டிரம்ப் தெரிவித்திருக்கிறார்.