மத்திய நிதியமைச்சர் நிர்மலா சீதாராமனிடம் தங்கம் தென்னரசு முன்வைத்த முக்கிய கோரிக்கை

தமிழ்நாட்டில் சுமார் 91 லட்சம் பேர் மகாத்மா காந்தி ஊரக வேலை வாய்ப்புத் திட்டத்தின் கீழ் பணியாற்றி வருகின்றனர். அவர்களுக்கு கடந்த இரண்டு மாதங்களாக ஊதியம் வழங்கப்படாமல் உள்ளது. இதுவரை நிலுவையில் உள்ள ஆயிரத்து 56 கோடி ரூபாய் ஊதிய நிலுவைத் தொகையை விடுவிக்கும்படி ஊரக வளர்ச்சி அமைச்சகத்துக்கு அறிவுறுத்துமாறு பிரதமர் நரேந்திர மோடிக்கு முதலமைச்சர் மு.க.ஸ்டாலின் அண்மையில் கடிதம் எழுதியிருந்தார்.

இந்நிலையில், டெல்லியில் மத்திய அமைச்சர் நிர்மலா சீதாராமனை தமிழ்நாடு நிதியமைச்சர் தங்கம் தென்னரசு, திமுக நாடாளுமன்ற குழுத் தலைவர் கனிமொழி, ஊரக வளர்ச்சித்துறை கூடுதல் தலைமைச் செயலாளர் ககன் தீப் சிங் பேடி ஆகியோர் சந்தித்துப் பேசினர். அப்போது, 100 நாள் வேலைத் திட்ட ஊதிய நிலுவைத் தொகையை உடனடியாக விடுவிக்கக் கோரி மனு அளித்தனர்.

இதையும் படிங்க : ஜிஎஸ்டி வரி குறைப்பு, காப்பீட்டுத் தொகை விடுவிப்பு… மத்திய பட்ஜெட்டில் லாரி உரிமையாளர்களின் எதிர்ப்பார்ப்புகள் என்னென்ன?

மத்திய மற்றும் மாநில அரசுகளின் நிதிநிலை அறிக்கை விரைவில் தாக்கல் செய்யப்பட இருக்கும் நிலையில், அதுகுறித்தும் இந்த சந்திப்பின் போது ஆலோசித்ததாகக் கூறப்படுகிறது.