Last Updated:
இந்தியாவில், கடந்த 10 ஆண்டுகளில் எல்பிஜி இணைப்புகளின் எண்ணிக்கை 100 சதவீதத்திற்கும் அதிகமாக உயர்ந்துள்ளதாக பெட்ரோலியம் மற்றும் இயற்கை எரிவாயு அமைச்சகத்தின் ஆண்டு இறுதி மதிப்பாய்வில் குறிப்பிடப்பட்டுள்ளது.
இந்தியாவில் வீட்டு சமையலறைகளுக்கான எல்பிஜி இணைப்புகளின் எண்ணிக்கை 2014 இல் 14.52 கோடியாக இருந்த நிலையில், அடுத்த 10 ஆண்டுகளில் 2 மடங்கு அதிகரித்து நவம்பர் 1, 2024 நிலவரப்படி 32.83 கோடியாக உயர்ந்துள்ளது என்று பெட்ரோலியம் மற்றும் இயற்கை எரிவாயு அமைச்சகம் கடந்த வாரம் வெளியிட்ட ஆண்டு இறுதி மதிப்பாய்வில் தெரிவித்துள்ளது.
“ஏப்ரல் 2014 முதல், எல்பிஜி இணைப்புகளின் எண்ணிக்கை 14.52 கோடியிலிருந்து 32.83 கோடியாக (நவம்பர் 1, 2024 நிலவரப்படி) உயர்ந்துள்ளது, இது 100 சதவீதத்தை விட அதிகமாக உயர்ந்துள்ளது என்பது குறிப்பிடத்தக்கது. 01.11.2024 நிலவரப்படி, சுமார் 30.43 கோடி எல்பிஜி நுகர்வோர் பிஏஎச்ஏஎல் (PAHAL) திட்டத்தின் கீழ் சேர்ந்துள்ளனர். ‘கிவ்இட்அப்’ பிரச்சாரத்தின் கீழ் இன்றுவரை, 1.14 கோடிக்கும் அதிகமான வாடிக்கையாளர்கள் தங்களது எல்பிஜி மானியத்தை விட்டுக்கொடுத்துள்ளனர்.
அதேநேரத்தில், 2014 முதல், எல்பிஜி விநியோகஸ்தர்கள் 13,896 லிருந்து 25,532 ஆக உயர்ந்துள்ளனர், இதனால் எல்பிஜி அணுகல் மற்றும் கிடைக்கும் தன்மை மேம்படுத்தப்பட்டுள்ளது. புதிய விநியோகஸ்தர்களில் 90% க்கும் அதிகமானோர் கிராமப்புறங்களுக்கு சேவை செய்கிறார்கள்,” என்று பெட்ரோலியம் மற்றும் இயற்கை எரிவாயு அமைச்சகம் தெரிவித்துள்ளது.
மானிய விலையில் சமையல் எரிவாயு பெறும் ஏழைக் குடும்பங்களுக்கு பிரதான் மந்திரி உஜ்வாலா யோஜனா (PMUY) திட்டத்தின் கீழ் 10.33 கோடி எல்பிஜி இணைப்புகள் வழங்கப்பட்டுள்ளன. இந்தத் திட்டம் தொடங்கப்பட்டதிலிருந்து, பிரதான் மந்திரி உஜ்வாலா யோஜனா திட்டத்தின் வீடுகளுக்கு சுமார் 222 கோடி எல்பிஜி ரீஃபில்கள் வழங்கப்பட்டுள்ளன. இதன் மூலம் தினமும் சுமார் 13 லட்சம் ரீஃபில்கள் எடுக்கப்படுகின்றன என்று அதிகாரப்பூர்வ அறிக்கை தெரிவிக்கிறது.
பெட்ரோலியம் மற்றும் இயற்கை எரிவாயு அமைச்சகமானது, “எண்ணெய் மற்றும் இயற்கை எரிவாயு ஆய்வு மற்றும் உற்பத்தி, சுத்திகரிப்பு, விநியோகம் மற்றும் சந்தைப்படுத்தல், இறக்குமதி, ஏற்றுமதி மற்றும் பெட்ரோலியப் பொருட்களின் பாதுகாப்பு ஆகியவற்றில் தீவிரம் காட்டி வருகிறது.
எண்ணெய் மற்றும் எரிவாயு இறக்குமதி நாட்டின் பொருளாதாரத்திற்கு முக்கியமான பங்கு வகிப்பதால், எரிசக்தி அணுகல், எரிசக்தி திறன், எரிசக்தி நிலைத்தன்மை மற்றும் எரிசக்தி பாதுகாப்பு ஆகியவற்றை நிவர்த்தி செய்ய, அனைத்து உள்நாட்டு பெட்ரோலிய வளங்களின் உற்பத்தியை அதிகரிக்க அமைச்சகத்தால் பல முயற்சிகள் எடுக்கப்பட்டுள்ளன,” என்று பெட்ரோலியம் மற்றும் இயற்கை எரிவாயு அமைச்சகம் வெளியிட்டுள்ள அறிக்கையில் தெரிவிக்கப்பட்டுள்ளது.
January 12, 2025 2:37 PM IST
