நாமல் வழக்கில் வாய் விட்டு மாட்டிய சட்டத்தரணி அலி சப்ரி: வெடித்த புதிய சர்ச்சை

விளக்கமறியலில் வைக்கப்பட்டுள்ள
நாடாளுமன்ற உறுப்பினர் நாமல் ராசபக்ச சார்பில் முன்னிலையான ஜனாதிபதி
சட்டத்தரணி அலி சப்ரி வெளியிட்ட கருத்து தொடர்பில் இலஞ்ச மற்றும் ஊழல் பற்றிய
குற்றச்சாட்டுகளைப் புலனாய்வு செய்வதற்கான ஆணைக்குழு கொழும்பு நீதவான்
நீதிமன்றில் கேள்வி எழுப்பியுள்ளது

“இன்று அடக்குமுறையாளர்களாக செயற்படுபவர்கள் நாளை பாதிக்கப்பட்டவர்களாக
மாறக்கூடும்” என அலி சப்ரி தெரிவித்திருந்தார்.

இந்த கூற்று இலஞ்ச ஊழல் ஆணைக்குழுவையா, அதன் விசாரணை அதிகாரிகளையா அல்லது
வழக்கில் சாட்சியமளிப்பவர்களையா இலக்கு வைத்து கூறப்பட்டது என ஆணைக்குழு
சார்பில் முன்னிலையான சிரேஷ்ட உதவிப் பணிப்பாளர் தனுஜா பண்டார மன்றில் கேள்வி எழுப்பினார்.

பாதிக்கப்படக்கூடிய நபர்கள்

நாமல் ராசபக்ச மற்றும் மற்றைய சந்தேகநபரான ஜானகி சிறிவர்தன ஆகியோர்
விளக்கமறியலில் வைக்கப்பட்ட பின்னரே, அச்சுறுத்தல் பயமின்றி உண்மையைக் கூற
இரண்டு சாட்சிகள் முன்வந்ததாக ஆணைக்குழு மன்றில் சுட்டிக்காட்டியது.

இந்த நிலையில், அலி சப்ரி குறிப்பிட்ட “பாதிக்கப்படக்கூடிய நபர்கள்” இந்த
சாட்சிகளா என்றும் ஆணைக்குழு வினவியது.

எனினும்,தனது கூற்று தவறாகப் புரிந்துகொள்ளப்பட்டுள்ளதாகக் குறிப்பிட்ட அலி
சப்ரி, ஜனாதிபதியின் அண்மைய உரைகளைக் குறிப்பிட்டுப் பதிலளித்தார்.

மேலும், அரசியலமைப்பின் 13(5) பிரிவின் கீழ் குற்றச்சாட்டுகள்
நிரூபிக்கப்படும் வரை அனைவரும் நிரபராதிகளே என்றும், நீதித்துறையும்
ஆணைக்குழுவும் சுயாதீனமானவை என்றும் சுட்டிக்காட்டினார்.

இதய அறுவை சிகிச்சை

நாமல் ராஜபக்ஷவின் தாயாருக்கு இதய அறுவை சிகிச்சை நடந்துள்ளதையும், பெற்றோர்
இருவரினதும் உடல்நலக் குறைவையும் விசேட காரணியாக முன்வைத்து பிணை கோரப்பட்டது.

இருப்பினும், சாட்சிகளுக்கு அச்சுறுத்தல் ஏற்படக்கூடும் எனக் கூறி ஆணைக்குழு
இதற்கு எதிர்ப்புத் தெரிவித்தது.

இரண்டு தரப்பு வாதங்களையும் பரிசீலித்த கொழும்பு மேலதிக நீதவான் அசங்க எஸ்.
போதரகம, நாமல் ராஜபக்ஷவின் பிணை கோரிக்கை மீதான உத்தரவு நவம்பர் 3 ஆம் திகதி வழங்கப்படும் என அறிவித்தார்.