முந்தைய திமுக ஆட்சிக் காலத்தில் கல்வித்துறை அமைச்சராகப் பதவி வகித்த மகேஷ், தனியார் பாடசாலைகளுக்கு அங்கீகாரம் வழங்குவது தொடர்பாக சுமார் 100 கோடி ரூபாய் லஞ்சம் பெறப்பட்டதாகக் கூறப்படும் வழக்கில், சென்னை மத்திய குற்றப்பிரிவு காவல்துறையினரால் கைது செய்யப்பட்டுள்ளார்.
இந்தக் குற்றச்சாட்டு தொடர்பில் சென்னை மத்திய குற்றப்பிரிவு காவல்துறையினர் வழக்குப் பதிவு செய்து விசாரணைகளை முன்னெடுத்துள்ளனர்.
இந்த வழக்கில் மகேஷ், தனியார் பள்ளிகள் சங்கத் தலைவர் பி.டி. அரசகுமார் மற்றும் மகேஷின் உதவியாளர் முத்துக்குமார் ஆகியோரின் பெயர்களும் குறிப்பிடப்பட்டுள்ளன.
நான்கு மணிநேரம் விசாரணை
இதன் தொடர்ச்சியாக, மகேஷுக்குச் சொந்தமான இடங்களில் சோதனைகள் நடத்தப்பட்டதுடன், அவரிடமும் விசாரணை மேற்கொள்ளப்பட்டது.
இந்த வழக்கில் முன்ஜாமீன் கோரி மகேஷ் சென்னை உயர் நீதிமன்றத்தில் மனுத் தாக்கல் செய்திருந்தார்.
மனுவை விசாரித்த நீதிபதி வி. லட்சுமி நாராயணன், முன்ஜாமீன் கோரிக்கையை நிராகரித்ததாகத் தெரிவிக்கப்பட்டுள்ளது.
இதனையடுத்து, இன்று மாலை மகேஷை மத்திய குற்றப்பிரிவு காவல்துறையினர் கைது செய்தனர்.
கைது செய்யப்பட்ட அவரிடம் சென்னை காவல்து ஆணையர் அலுவலகத்தில் சுமார் நான்கு மணிநேரம் விசாரணை நடத்தப்பட்டதையடுத்து, மருத்துவப் பரிசோதனைக்காக அழைத்துச் செல்லப்பட்டார்.
ஸ்டாலின் கண்டனம்
மகேஷின் கைது நடவடிக்கைக்கு திமுக தலைவர் மு.க. ஸ்டாலின் கண்டனம் தெரிவித்துள்ளார்.
இது தொடர்பில் அவர் வெளியிட்ட அறிக்கையில், அரசியல் காழ்ப்புணர்ச்சி காரணமாகவே மகேஷ் கைது செய்யப்பட்டுள்ளதாகக் குற்றஞ்சாட்டியுள்ளார்.
விசாரணைக்கு முழுமையான ஒத்துழைப்பு வழங்கி வந்த மகேஷைக் கைது செய்ததன் மூலம், மாநிலத்தில் நிலவும் சட்டம் ஒழுங்கு மற்றும் நிர்வாகம் தொடர்பான பிரச்சினைகளிலிருந்து மக்களின் கவனத்தைத் திசைதிருப்ப ஆளும் அரசு முயற்சிப்பதாகவும் அவர் தெரிவித்துள்ளார்.
மேலும், மகேஷ் தன் மீதான குற்றச்சாட்டுகளைச் சட்டப்படி எதிர்கொள்வார் எனக் குறிப்பிட்ட ஸ்டாலின், கைது நடவடிக்கைகள் மூலம் மக்களின் கவனத்தைத் திசைதிருப்பிவிடலாம் என ஆளும் தமிழக வெற்றிக் கழக அரசு கருதினால், அந்த எண்ணம் நிறைவேறாது என்றும் தெரிவித்துள்ளார்.
| செய்திகளை உடனுக்குடன் தெரிந்து கொள்ள IBC தமிழ் WHATSAPP CHANNEL இல் இணைந்து கொள்ளுங்கள்…! |
