Last Updated:
விழுப்புரம் மாவட்டம் கோலியனூர் வட்டாரத்தில் தசரா மற்றும் ஆயுதப் பூசையை முன்னிட்டு கேந்தி மலர் அறுவடை பணிகள் தீவிரமாக நடைபெற்று வருகின்றன.
விழுப்புரம் மாவட்டம் கோலியனூர் வட்டாரத்தில் தசரா மற்றும் ஆயுதப் பூசையை முன்னிட்டு கேந்தி மலர் அறுவடை பணிகள் தீவிரமாக நடைபெற்று வருகின்றன. விவசாயிகள் மலர்களை உள்ளூர் சந்தைகளுக்கு விற்பனைக்கு அனுப்பி வைத்து வருகின்றனர்.
விழுப்புரம் மாவட்டம், கோலியனூர் வட்டாரத்திற்கு உட்பட்ட சித்தாத்தூர், திருக்கை உள்ளிட்ட பல்வேறு பகுதிகளில் சுமார் 3 ஹெக்டர் பரப்பளவில் மஞ்சள் மற்றும் சிவப்பு வண்ண கேந்தி (சாமந்தி) மலர் சாகுபடி செய்யப்பட்டுள்ளது. தசரா பண்டிகையை முன்னிட்டு தற்போது இப்பகுதிகளில் மலர் அறுவடை பணிகள் தீவிரமாக நடைபெற்று வருகின்றன.
இந்த மலர் சாகுபடி குறித்து விவசாயி வினோத் கூறுகையில், ஒரு ஏக்கருக்கு குறைந்தபட்சம் 10,000 முதல் 11,000 செடிகள் வரை தேவைப்படுகிறது. போக்குவரத்துச் செலவு உட்பட ஒரு செடியின் விலை ரூ.2 முதல் ரூ.2.50 வரை கொடுத்து வாங்கி வருகிறோம். வயலைத் தகுந்த முறையில் தயார் செய்து, முறையாகப் பராமரித்து தற்போது பூக்களை அறுவடை செய்து வருகிறோம்.
ஒரு ஏக்கருக்கு ரூ.25,000 முதல் ரூ.80,000 வரை செலவாகிறது. இது ஒரு குறுகிய கால 3 மாதப் பயிராகும். முறையாகப் பராமரித்தால், ஒரு ஏக்கரில் இருந்து சுமார் 500 கிலோ வரை பூக்களை அறுவடை செய்ய முடியும் என்றார்.
இங்கு அறுவடை செய்யப்படும் பூக்கள் விழுப்புரம் உள்ளூர் சந்தைகளுக்கும், திண்டிவனம் மற்றும் சுற்றுவட்டாரப் பகுதிகளிலுள்ள மலர் சந்தைகளுக்கும் விற்பனைக்காக அனுப்பி வைக்கப்படுகின்றன. தற்போது விழுப்புரத்தில் பெய்து வரும் தொடர் மழையின் காரணமாக பூக்களின் விலை சற்று சரிவு கண்டுள்ளது.
மேலும், தொடர் மழையால் பூக்களில் வெற்றிிலை கார் நோய் தாக்குதல் ஏற்பட்டுள்ளதும் விலை குறைய ஒரு காரணமாகும். இருப்பினும், வரும் நாட்களில் மழை நின்று இயல்பு நிலை திரும்பினால், ஆயுத பூஜை மற்றும் தசரா பண்டிகைக்கு நல்ல விலை கிடைக்கும் என்ற நம்பிக்கையுடன் விவசாயிகள் காத்திருக்கின்றனர்.
