மாதம் 50 வீத இலாபம் தருவதாகக் கூறி பொதுமக்களை ஏமாற்றும் போலி முதலீட்டுத் திட்டங்கள் தொடர்பில் அவதானமாக இருக்குமாறு, இலங்கை பொலிஸார் விசேட எச்சரிக்கை விடுத்துள்ளனர்.
அதிக இலாபம் தருவதாகக் கூறி பொதுமக்களை ஏமாற்றும் போலி நிதி முதலீட்டுத் திட்டங்கள் தொடர்பில் மிகுந்த அவதானத்துடன் இருக்குமாறு இலங்கைப் பொலிஸார் விசேட எச்சரிக்கை விடுத்துள்ளனர்.
சமீபகாலமாக முன்னெடுக்கப்படும் இவ்வாறான பல போலி முதலீட்டுத் திட்டங்களில், கவர்ச்சியான உரைகள் மூலம் பொதுமக்கள் ஈர்க்கப்பட்டு வருவதாக பொலிஸார் சுட்டிக்காட்டியுள்ளனர்.
குறிப்பாக, இது ஒரு நிதிச் சுரங்கம் என்றும், தாம் சொகுசு வாகனங்களில் வலம்வருவதைப் போல ஏனையோரும் குறுகிய காலத்தில் முன்னேற முடியும் என்றும் ஆசைவார்த்தைகள் கூறப்படுவதாக தெரிவிக்கப்பட்டுள்ளது.
அத்துடன், முதலீடு செய்யப்படும் தொகைக்கு அமைய மாதத்துக்கு 50 வீத இலாபப் பங்கு வழங்கப்படும் என்ற போலி வாக்குறுதிகள் வழங்கப்பட்டு, நிதி திரட்டப்படுவதாகவும் பொலிஸார் குறிப்பிட்டுள்ளனர்.
இவ்வாறான கவர்ச்சிகரமான வார்த்தைகளை நம்பி ஏமாற வேண்டாம் என பொதுமக்களைக் கேட்டுக்கொண்டுள்ள பொலிஸார், எந்தவொரு நிறுவனத்திலோ அல்லது திட்டத்திலோ பணத்தை முதலீடு செய்வதற்கு முன்னர் தீவிரமாக சிந்திக்குமாறு அறிவுறுத்தியுள்ளனர்.
குறிப்பாக, குறித்த தரப்பினரால் எவ்வாறு இவ்வளவு அதிக இலாபத்தை வழங்க முடிகிறது என்பதையும், அவர்கள் உண்மையில் எவ்வகையான வர்த்தக நடவடிக்கைகளில் ஈடுபடுகிறார்கள் என்பதையும் ஆராய்ந்து பார்க்குமாறும் பொலிஸார் வலியுறுத்தியுள்ளனர்.
பொதுமக்கள் இத்தகைய போலி வாக்குறுதிகளை நம்பி ஏமாந்துவிடாமல், விவேகமாகச் செயற்பட்டு, தங்களின் கடின உழைப்பினால் ஈட்டிய நிதியைப் பாதுகாத்துக்கொள்ள வேண்டும் என பொலிஸார் மேலும் கேட்டுக்கொண்டுள்ளனர்.
