சவுதி அரேபியாவின் ரியாத் சர்வதேச விமான நிலையம் மீது ஹூதி கிளர்ச்சியாளர்கள் நடத்திய இரண்டாவது தாக்குதலில் ஒருவர் உயிரிழந்துள்ளதுடன் 11 பேர் காயமடைந்துள்ளனர்.
சவுதி அரேபியாவின் தலைநகர் ரியாத்தில் உள்ள சர்வதேச விமான நிலையத்தின் மீது நடத்தப்பட்ட இரண்டாவது தாக்குதலில் ஒருவர் உயிரிழந்துள்ளதுடன், 11 பேர் காயமடைந்துள்ளதாக அதிகாரிகள் தெரிவித்துள்ளனர்.
மன்னர் காலித் சர்வதேச விமான நிலையத்தின் மீது ஞாயிற்றுக்கிழமை நடத்தப்பட்ட இந்தத் தாக்குதலில், பயணிகளுக்கான முனையமொன்றில் தீ விபத்து ஏற்பட்டதாக சவுதி இராணுவ பேச்சாளர் குறிப்பிட்டுள்ளார்.
உயிரிழந்த நபர் பாகிஸ்தானிய நாட்டவர் என சவுதி அரேபியாவின் சிவில் விமானப் போக்குவரத்து அதிகார சபை எக்ஸ் தளத்தில் வெளியிட்டுள்ள அறிக்கையில் உறுதிப்படுத்தியுள்ளது. இதே விமான நிலையத்தின் மீது முந்தைய நாள் மேற்கொள்ளப்பட்ட தாக்குதலில் 13 பேர் உயிரிழந்து 308 பேர் காயமடைந்திருந்த நிலையில், இந்த அடுத்தடுத்த தாக்குதல் இடம்பெற்றுள்ளது.
இந்தத் தாக்குதல்களுக்கு ஏமனின் ஹூதி கிளர்ச்சியாளர்கள் உரிமை கோரியுள்ளதுடன், சவுதி அரேபியாவின் வான்வெளி மற்றும் விமான நிலையங்களைப் பயன்படுத்துவதைத் தவிர்க்குமாறு விமான நிறுவனங்களுக்கும் பயணிகளுக்கும் எச்சரிக்கை விடுத்துள்ளனர்.
கடந்த 24 மணி நேரத்தில் பாலிஸ்டிக் ஏவுகணைகள், குரூஸ் ஏவுகணைகள் மற்றும் ட்ரோன்களைப் பயன்படுத்தி ரியாத் விமான நிலையத்தை இலக்கு வைத்ததாக ஹூதி அமைப்பு தெரிவித்துள்ளது. கிழக்கு சவுதி அரேபியாவில் உள்ள எண்ணெய் சுத்திகரிப்பு நிலையங்கள் மற்றும் தம்மாம் விமான நிலையத்தின் மீதும் தாக்குதல்களை நடத்தியதாக ஹூதி இராணுவ பேச்சாளர் பிரிகேடியர் ஜெனரல் யாஹ்யா சாரீ தெரிவித்துள்ளார்.
புனித நகரங்களான மக்கா மற்றும் மதீனாவைத் தவிர்த்து, சவுதி அரேபியாவின் ஏனைய அனைத்து விமான நிலையங்களும் தாக்குதலுக்குரிய இலக்குகளாகக் கருதப்படும் என எச்சரித்துள்ள அவர், சவுதி எல்லைக்குள் தீவிரத் தாக்குதல்கள் தொடரும் எனக் கூறியுள்ளார்.
ஏமன் உள்நாட்டுப் போரில் அந்நாட்டு அரசாங்கப் படைகளுக்கு சவுதி அரேபியா வழங்கி வரும் ஆதரவு மற்றும் சனா விமான நிலையத்தின் மீது நடத்தப்பட்ட வான்வழித் தாக்குதலுக்குப் பதிலடியாகவே சவுதி அரேபியாவை இலக்கு வைத்துத் தாக்குதல்களை முன்னெடுப்பதாக ஹூதி கிளர்ச்சியாளர்கள் தரப்பில் தெரிவிக்கப்பட்டுள்ளது.
