புத்ராஜெயா: மலேசியாவிற்கான தனது இரண்டு நாள் அதிகாரப்பூர்வ பயணத்தின் ஒரு பகுதியாக, மியான்மர் அதிபர் மின் ஆங் ஹ்லாயிங்கிற்கு வியாழக்கிழமை (அக்டோபர் 8) பெர்டானா புத்ரா வளாகத்தில் அதிகாரப்பூர்வ வரவேற்பு அளிக்கப்பட்டது. காலை 9 மணிக்கு மின் ஆங் ஹ்லாயிங் வந்தடைந்ததும், இரு நாடுகளின் தேசிய கீதங்கள் இசைக்கப்பட, பிரதமர் டத்தோ ஶ்ரீ அன்வார் இப்ராஹிம் அவரை வரவேற்றார். அதனைத் தொடர்ந்து, மேஜர் முஹம்மது நூர் அதீன் முஸ்தாசாவின் தலைமையில் இயங்கும் ராயல் ரேஞ்சர் ரெஜிமென்ட்டின் முதல் பட்டாலியனைச் சேர்ந்த மூன்று அதிகாரிகள் மற்றும் 103 வீரர்கள் அமைத்திருந்த மரியாதைக் காவற்படையை மின் ஆங் ஹ்லாயிங் ஆய்வு செய்தார்.
மேலும், வெளியுறவு அமைச்சர் டத்தோ ஶ்ரீ முகமது ஹசான், உள்துறை அமைச்சர் டத்தோ ஶ்ரீ சைஃபுதீன் நசுத்தியோன் இஸ்மாயில், முதலீடு, வர்த்தகம் மற்றும் தொழில்துறை அமைச்சர் டத்தோ ஶ்ரீ ஜோஹரி அப்துல் கனி ஆகியோருடன் அமைச்சரவை உறுப்பினர்கள், வெளிநாட்டுத் தூதர்கள் மற்றும் மூத்த அரசாங்க அதிகாரிகளும் உடனிருந்தனர். வருகைப் பதிவேட்டில் கையெழுத்திட்ட பிறகு, மின் ஆங் ஹ்லைங், அன்வாருடன் ஒரு தனிப்பட்ட சந்திப்பை நடத்தினார். அதனைத் தொடர்ந்து, இரு நாடுகளின் முக்கிய அமைச்சர்கள் மற்றும் மூத்த அதிகாரிகள் கலந்துகொண்ட இருதரப்பு தூதுக்குழு அமர்வு நடைபெற்றது.
மலேசியாவில் சட்டவிரோதமாக வசிக்கும் மியான்மர் நாட்டினரைத் தாமாக முன்வந்து, பாதுகாப்பாகவும், கண்ணியமாகவும் தாயகம் திரும்ப அழைத்து வருவது குறித்தும், அத்துடன் பிராந்திய ஆசியான் வழிமுறைகள் மூலம் மேற்கொள்ளப்படும் அமைதி மற்றும் ஸ்திரத்தன்மை முயற்சிகளை மறுஆய்வு செய்வது குறித்தும் இரு தலைவர்களுக்கும் இடையிலான கலந்துரையாடல்கள் கவனம் செலுத்தும் எனத் திட்டமிடப்பட்டுள்ளது.
