Last Updated:
சிங்கப்பூர் அரசாங்கம் பிறப்பு விகிதத்தை உயர்த்தவும் குடும்ப வாழ்க்கையை ஊக்குவிக்கவும் புதிய டேட்டிங் செயலியை வெளியிட்டுள்ளது.
சிங்கப்பூரில் பிறப்பு விகித சரிவைக் கட்டுப்படுத்தும் நோக்கில், இளைய தலைமுறையை கவர பல்வேறு சலுகைகளுடன் சிங்கப்பூர் அரசாங்கம் புதிய டேட்டிங் செயலி வெளியிட்டுள்ளது.
சிங்கப்பூரில் தொடர்ந்து சரிந்து வரும் பிறப்பு விகிதத்தை உயர்த்தவும், நாட்டில் திருமணங்கள் குறையும் சூழலை மாற்றியமைக்கவும், இளைஞர்கள் மத்தியில் குடும்ப வாழ்க்கையை ஊக்குவிக்கவும் சிங்கப்பூர் அரசு ஒரு புதிய முயற்சியைக் கையில் எடுத்துள்ளது.
அந்நாட்டு சமூக மற்றும் குடும்ப மேம்பாட்டு அமைச்சகத்தின் கீழ் இயங்கும் பல்வேறு அமைப்புகளின் ஆதரவுடன், இளைஞர்கள் தங்களின் வாழ்க்கைத் துணையைத் தேர்வு செய்ய ஏதுவாக பிரத்யேகமான டேட்டிங் செயலி ஒன்றை அரசு அறிமுகப்படுத்தியுள்ளது.
இதன்படி, இந்த செயலி மூலம் இணையும் ஜோடிகளுக்கு அரசால் அங்கீகரிக்கப்பட்ட உணவகங்கள், திரையரங்குகள் மற்றும் பொழுதுபோக்கு மையங்களில் சிறப்பு தள்ளுபடிகள் வழங்கப்படவுள்ளன.
போலி கணக்குகளைத் தவிர்க்க அந்நாட்டின் தேசிய அடையாள அட்டையான ‘Singpass’ மூலம் மட்டுமே இதில் கணக்கு தொடங்க முடியும் என்றும், பாதுகாப்பான முறையில் இளைஞர்கள் தங்களின் வாழ்க்கைத் துணையைத் தேர்ந்தெடுக்க இந்தச் செயலி உதவும் என்றும் சிங்கப்பூர் அரசு தெரிவித்துள்ளது.
