மலையக ரயில் பாதையில் திங்கட்கிழமை (05) அதிகாலை தடம் புரண்ட ரயிலால் ஏற்பட்ட தடையையடுத்து பாதிக்கப்பட்ட ரயில் சேவைகள் தற்போது வழமைக்கு திரும்பியுள்ளன.
கங்கொட மற்றும் கடிகமுவ ரயில் நிலையங்களுக்கு இடையில் தடம் புரண்ட ரயிலை மீண்டும் தண்டவாளத்தில் நிறுத்தும் பணிகள் நிறைவடைந்ததைத் தொடர்ந்து, குறித்த பாதையில் ரயில் சேவைகள் மீண்டும் ஆரம்பிக்கப்பட்டுள்ளதாக ரயில்வே அதிகாரிகள் தெரிவித்துள்ளனர்.
பெராதெனிய சந்தியிலிருந்து கொழும்பு கோட்டை நோக்கி அதிகாலை 4.40 மணிக்கு புறப்படவிருந்த ரயிலே, கடும் மழையினால் மண்மேடு மற்றும் பாறைகள் தண்டவாளத்தில் விழுந்ததைத் தொடர்ந்து தடம் புரண்டுள்ளது.
இதன் காரணமாக பிரதான ரயில் பாதையில் இரு திசைகளிலும் பயணித்த ரயில் சேவைகளில் தாமதம் ஏற்பட்டது. பாதிக்கப்பட்ட ரயில் சேவை தாமதமாகலாம் அல்லது இரத்துச் செய்யப்படலாம் என அதிகாரிகள் முன்னதாக அறிவித்திருந்தனர்.
