Last Updated:
இந்திய கோல்கீப்பர் மோஹித் சிறந்த தடுப்பாட்டங்களை வெளிப்படுத்தி ஜப்பானின் கோல் வாய்ப்புகளை முறியடித்தார்.
ஜப்பானின் கிஃபு ப்ரெஃபெக்ச்சுரல் கிரீன் மைதானத்தில் இன்று நடைபெற்ற ஆசிய விளையாட்டுப் போட்டிகள் 2026-ன் ஆடவர் ஹாக்கி ஏ பிரிவு லீக் ஆட்டத்தில், இந்திய அணி 2-0 என்ற கோல் கணக்கில் போட்டியை நடத்திய ஜப்பான் அணியை வீழ்த்தி அபார வெற்றி பெற்றது. இந்த வெற்றியின் மூலம் தொடர்ச்சியாக 4-வது வெற்றியைப் பதிவு செய்த இந்திய அணி, 12 புள்ளிகளுடன் ஏ பிரிவில் முதலிடத்தைப் பிடித்து அதிகாரப்பூர்வமாக அரையிறுதிக்கு முன்னேறியுள்ளது.
மழை பொழிந்த ஈரமான சூழலில் நடைபெற்ற இப்போட்டியின் முதல் கால் பகுதியில் இரு அணிகளும் வெற்றிக்காக தீவிரமாகப் போராடின. ஆட்டத்தின் 15-வது நிமிடத்தில், சஞ்சய் கொடுத்த பாஸை அற்புதமாகப் பெற்ற இந்திய நட்சத்திர வீரர் அபிஷேக், பந்தைச் சாமர்த்தியமாக கோல் போஸ்ட்டின் இடது மூலையில் தள்ளி இந்தியாவிற்கு 1-0 என முதல் கோலை பெற்றுத் தந்தார்.
இரண்டாம் கால் பகுதியில் ஜப்பான் அணி கோல் அடிக்கப் பல முயற்சிகளை மேற்கொண்ட போதிலும், இந்திய கோல்கீப்பர் மோஹித் சிறந்த தடுப்பாட்டங்களை வெளிப்படுத்தி ஜப்பானின் கோல் வாய்ப்புகளை முறியடித்தார்.
தொடர்ந்து நடைபெற்ற ஆட்டத்தின் 40-வது நிமிடத்தில், இந்தியாவிற்கு கிடைத்த ‘பெனால்டி கார்னர்’ வாய்ப்பைச் சரியாகப் பயன்படுத்திய இந்திய அணியின் கேப்டன் ஹர்மன்பிரீத் சிங், டிராக்-ஃபிளிக் மூலம் பந்தை கோலாக்கி இந்தியாவின் முன்னிலையை 2-0 என உயர்த்தினார்.
ஆட்டத்தின் கடைசி நிமிடங்களில் ஜப்பான் அணி தொடர் தாக்குதல்களைத் தொடுத்தபோதிலும், இந்திய அணியின் பலமான தடுப்பாட்டம் காரணமாக அவர்களால் கோல் எதுவும் அடிக்க முடியவில்லை. இறுதியில், இந்தியா 2-0 என்ற கோல் கணக்கில் போட்டியை வென்று அரையிறுதி சுற்றை உறுதி செய்தது.
