Last Updated:
9 அடுக்குகள் கொண்ட 25 மனிதக் கோபுரங்களை அசாத்திய திறமையுடன் கட்டி அமைத்தனர் உள்ளூர் மனிதக் கோபுரக் குழுக்கள்.
ஸ்பெயின் நாட்டின் பார்சிலோனா நகரில், ‘லா மெர்சே’ திருவிழாவையொட்டி, பிரமாண்டமான மனிதக் கோபுரங்கள் அமைக்கப்பட்டுள்ளன.
பார்சிலோனா நகரில், ‘லா மெர்சே’ திருவிழாவின் ஒரு பகுதியாக அங்குள்ள நகர் மன்ற கட்டிடம் முன்பு திரண்ட உள்ளூர் மனிதக் கோபுரக் குழுக்கள், பாரம்பரிய இசையான ‘கிராலைஸ்’ மற்றும் ‘டிம்பால்’ மேள தாள முழக்கங்களுக்கு இடையே, 9 அடுக்குகள் கொண்ட 25 மனிதக் கோபுரங்களை அசாத்திய திறமையுடன் கட்டி அமைத்தனர். மனிதக் கோபுரத்தின் உச்சிக்கு ஏறி, கையை அசைத்துச் சாதனையை நிறைவு செய்யும் ‘என்க்சானெட்ஸ்’ எனப்படும் சிறுவர்களின் பாதுகாப்பிற்காக, தவறி கீழே விழுந்தாலும் ஆபத்து ஏற்படாத வகையில் பிரத்யேகமாக வடிவமைக்கப்பட்ட புதிய தலைக்கவசங்கள் முதன்முறையாக இந்த விழாவில் அறிமுகப்படுத்தப்பட்டு அணிவிக்கப்பட்டன.
நூற்றுக்கணக்கான பார்வையாளர்கள் திரண்டு நின்று ஆரவாரத்துடன் இந்நிகழ்வை கண்டுகளித்தனர். கட்டலோனியா பிராந்தியத்தின் கலாச்சாரப் பெருமையாகக் கருதப்படும் இந்த ‘கேஸ்டல்ஸ்’ மனிதக் கோபுரக் கலை, கடந்த 2010-ஆம் ஆண்டில் யுனெஸ்கோவின் உலகப் பாரம்பரியப் பட்டியலில் சேர்க்கப்பட்டு கவுரவிக்கப்பட்டது குறிப்பிடத்தக்கது.
