பாராளுமன்ற உறுப்பினர் நாமல் ராஜபக்சவுக்கு 70 மில்லியன் (7 கோடி) ரூபாய் லஞ்சம் வழங்கியதாகக் கைது செய்யப்பட்டு நீதிமன்றத்தில் ஆஜர்படுத்தப்பட்ட கிரிஷ் தனியார் நிறுவனத்தின் பணிப்பாளர் கீதாஞ்சலி ஜானகி டி சொய்சா சிரிவர்தனவை எதிர்வரும் 06 ஆம் திகதி வரை விளக்கமறியலில் வைக்குமாறு கொழும்பு பிரதான நீதவான் அஸங்க எஸ். போதரகம வியாழக்கிழமை (24) உத்தரவிட்டுள்ளார்.
நகர அபிவிருத்தி அதிகார சபைக்குச் சொந்தமான கொழும்பு கோட்டை டிரான்ஸ்வொர்க் சதுக்கம் எனப்படும் நிலத்தை ‘Krrish Transworks Colombo (Pvt) Ltd’ நிறுவனம் விரைவாகப் பெற்றுக்கொள்வதற்கும், நிறுவனத்திற்குத் தேவையான அனுமதிகளை விரைவாகப் பெற்றுக்கொள்வதற்கு உதவி வழங்குவதற்காகவும், குறித்த நிறுவனத்தினால் மூன்று சந்தர்ப்பங்களில் பாராளுமன்ற உறுப்பினர் நாமல் ராஜபக்சவுக்கு 70 மில்லியன் ரூபாய் லஞ்சமாக வழங்கப்பட்டது தொடர்பில், சந்தேக நபர் லஞ்சம் மற்றும் ஊழல் விசாரணை ஆணைக்குழுவால் கைது செய்யப்பட்டு நீதிமன்றத்தில் ஆஜர்படுத்தப்பட்டமை குறிப்பிடத்தக்கது.
