செப்டம்பர் 28 முதல் 3 நாட்கள் வங்கி ஊழியர்கள் வேலைநிறுத்தம் அறிவித்துள்ளதால் தொடர்ந்து 5 நாட்களுக்கு வங்கி சேவைகள் பாதிக்கும் நிலை ஏற்பட்டிருந்தது.
வாரத்தில் 5 நாட்கள் மட்டுமே வேலைநாட்களாக அறிவிக்கப்பட வேண்டும் என்ற கோரிக்கையை வலியுறுத்தி, நாடு தழுவிய போராட்டத்தில் ஈடுபட உள்ளதாக வங்கி ஊழியர்கள் சங்கம் அறிவித்துள்ளது.
இந்த நிலையில், செப்டம்பர் 26 நான்காவது சனிக்கிழமை வருவதாலும் செப்டம்பர் 27 ஞாயிற்றுக்கிழமை என்பதாலும் வழக்கம் போல 2 நாட்கள் வங்கிகள் இயங்காத சூழல் காணப்பட்டதால் பொதுமக்கள் பாதிக்கப்படும் நிலை உருவானது.
அதை தொடர்ந்து வங்கி ஊழியர்களின் போராட்டம் செப்டம்பர் 28 ஆம் தேதி திங்கட்கிழமை தொடங்கி 3 நாட்களுக்கு நடைபெற உள்ளது.
இதனால், செப்டம்பர் 26 முதல் தொடர்ந்து 5 நாட்களுக்கு நாடு முழுவதும் வங்கி கிளைகளின் சேவைகள் கடுமையாகப் பாதிக்கப்படக்கூடிய சூழல் உருவாகி இருந்தது.
மேலும், அக்டோபர் 2-ஆம் தேதி காந்தி ஜெயந்தி தேசிய விடுமுறை என்பதால், வரும் வாரத்தில் இரண்டு நாட்கள் மட்டுமே வங்கிகள் செயல்படும் நிலை ஏற்பட்டிருந்தது.
இதனால், எஸ்பிஐ, பஞ்சாப் நேஷனல் பேங்க், கனரா பேங்க், யூனியன் பேங்க் ஆஃப் இந்தியா போன்ற முன்னணி வங்கிகள் தங்கள் வாடிக்கையாளர்களுக்கு எச்சரிக்கை அறிவிப்பை வெளியிட்டுள்ளன.
வங்கி கிளைகள் சார்ந்த முக்கியமான பணிகளைச் செப்டம்பர் 25-ஆம் தேதிக்குள் முடித்துக்கொள்ளுமாறு கேட்டுக் கொண்டிருந்தன.
இந்த நிலையில் வரும் 27ஆம் தேதி ஞாயிறு அன்று அனைத்து பொதுத்துறை மற்றும் ஊரக வங்கிகள் செயல்படும் என மத்திய நிதி அமைச்சகம் அறிவிப்பை வெளியிட்டுள்ளது. திங்கள் அன்று ஊழியர் சங்கங்கள் வேலை நிறுத்த போராட்டத்தில் ஈடுபட உள்ளதால் அதற்கு முன்பாக பொதுமக்கள் தங்களது அலுவல்களை முடித்துக் கொள்வதற்காக வரும் ஞாயிறு அன்று வங்கிகள் செயல்படும் என்ற அறிவிப்பு வெளியாகி உள்ளது.
