விஜயதசமி நாளில் அதிரடி மாற்றம்.. இந்தியப் பொருட்களுக்கு முழு வரிவிலக்கு அளித்தது நியூசிலாந்து! | India News (இந்தியா செய்திகள்)

தற்போது 2.4 பில்லியனாக இருக்கும் இருதரப்பு வர்த்தகத்தை 5 பில்லியனாக உயர்த்துவது இந்த ஒப்பந்தத்தின் முதன்மை இலக்காகும். மேலும், அடுத்த 15 ஆண்டுகளில் இந்தியாவில் சுமார் 20 பில்லியன் வெளிநாட்டு நேரடி முதலீடு வருவதற்கான வழிகள் திறக்கப்பட்டுள்ளன.

இந்தியாவிலிருந்து ஏற்றுமதி செய்யப்படும் அனைத்து பொருட்களுக்குமான சுங்க வரியை நியூசிலாந்து அரசு முழுமையாக ரத்து செய்துள்ளது. இதுவரை விதிக்கப்பட்டு வந்த சுமார் 10% வரி ரத்து செய்யப்படுவதால், இந்தியாவின் ஜவுளி (Textiles), மருந்துப் பொருட்கள் (Pharma), தோல் பொருட்கள் (Leather) மற்றும் ஆட்டோ பாகங்கள் (Auto Components) தயாரிப்புத் துறைகள் பெரும் பயனடையும்.

உள்ளூர் விவசாயிகள் மற்றும் வர்த்தகர்களின் நலனைக் கருத்தில் கொண்டு, நியூசிலாந்தின் முதன்மை ஏற்றுமதி பொருட்களான வெண்ணெய், பாலாடைக்கட்டி (Cheese), வெங்காயம் போன்ற பொருட்களுக்கு வரி விலக்கு அளிக்கப்படவில்லை. இதன் மூலம் இந்திய விவசாயிகளின் வாழ்வாதாரம் பாதுகாக்கப்பட்டுள்ளது.

இந்தியத் தொழில் வல்லுநர்களுக்காக (IT & Skilled Professionals) ஆண்டுக்கு 5,000 வேலைவாய்ப்பு விசாக்கள் (Work Visas) கொண்ட சிறப்பு ஒதுக்கீடு உருவாக்கப்பட்டுள்ளது. நியூசிலாந்தில் STEM (அறிவியல், தொழில்நுட்பம், பொறியியல், கணிதம்) படிப்புகளைப் படிக்கும் இந்திய மாணவர்களுக்குப் படிப்பிற்குப் பிறகு 3 முதல் 4 ஆண்டுகள் வரை தங்கிப் பணிபுரியும் விசா (Post-study work visa) பெறத் தகுதி கிடைக்கும்.

முதன்முறையாக மேலைநாடு ஒன்றுடனான வர்த்தக ஒப்பந்தத்தில் ஆயுர்வேதம் மற்றும் யோகா சான்றிதழ்களுக்குச் சட்டப்பூர்வ அங்கீகாரம் வழங்கப்பட்டுள்ளது. வர்த்தக நடைமுறைகள் எளிமையாக்கப்பட்டு, சாதாரணப் பொருட்களுக்கு 48 மணி நேரத்திற்குள்ளும், அழுகக்கூடிய அத்தியாவசியப் பொருட்களுக்கு (Perishables) 24 மணி நேரத்திற்குள்ளும் சுங்க அனுமதி வழங்கப்படும்.

நியூசிலாந்து நாடாளுமன்றத்தில் 93 எம்பி-க்களின் ஆதரவோடு நிறைவேற்றப்பட்டுள்ள இந்த ஒப்பந்தம், இந்தியாவின் உலகளாவிய வர்த்தகக் கொள்கையில் ஒரு மிகப்பெரிய மைல்கல்லாகக் கருதப்படுகிறது.