Last Updated:
இரு நாடுகளுக்கும் இடையேயான வர்த்தக பேச்சுவார்த்தைகள் திட்டமிட்டபடி சரியான பாதையிலேயே சென்று கொண்டிருக்கின்றன – பியூஷ் கோயல்
அமெரிக்காவுடனான தற்காலிக வர்த்தக ஒப்பந்தத்தை இறுதி செய்வதில் இந்தியா வேண்டுமென்றே மெத்தனமாகச் செயல்படுவதாக வெளியான தகவல்களுக்கு, மத்திய வர்த்தகம் மற்றும் தொழில்துறை அமைச்சர் பியூஷ் கோயல் கடும் கண்டனம் தெரிவித்துள்ளார்.
முன்னதாக, சர்வதேச செய்தி நிறுவனமான ராய்ட்டர்ஸ் (Reuters), இந்திய மற்றும் அமெரிக்க அதிகாரிகள் சிலரை மேற்கோள் காட்டி ஒரு செய்தியை வெளியிட்டிருந்தது. அதில், தற்போதைய சர்வதேச புவிசார் அரசியல் மற்றும் வலுவான பொருளாதாரச் சூழல் காரணமாக இந்தியாவின் பேரம் பேசும் திறன் அதிகரித்துள்ளதாகவும், இதனால் அமெரிக்காவுடன் அவசரப்பட்டு ஒரு தற்காலிக ஒப்பந்தத்தை மேற்கொள்ள இந்தியா விரும்பவில்லை என்றும் கூறப்பட்டிருந்தது.
மேலும், விவசாயம் போன்ற உணர்வுப்பூர்வமான துறைகளில் விட்டுக்கொடுக்க இந்தியா மறுப்பதாகவும், டிரம்ப் நிர்வாகத்தின் புதிய வர்த்தகக் கொள்கைகளுக்கு பயந்து அவசர ஒப்பந்தங்களில் கையெழுத்திட டெல்லி தயாராக இல்லை என்றும் அந்த அறிக்கையில் குறிப்பிடப்பட்டிருந்தது.
இந்த செய்திக்கு தனது எக்ஸ் (X) தள பக்கத்தில் உடனடியாகப் பதிலளித்துள்ள அமைச்சர் பியூஷ் கோயல், இரு நாடுகளுக்கும் இடையேயான வர்த்தக பேச்சுவார்த்தைகள் திட்டமிட்டபடி சரியான பாதையிலேயே சென்று கொண்டிருக்கின்றன என்பதை உறுதிப்படுத்தியுள்ளார்.
கடந்த ஜூன் மாதம் புதுடெல்லிக்கு வருகை தந்த அமெரிக்க வர்த்தகப் பிரதிநிதி ஜேமிசன் கிரீருடன் தான் நடத்திய சந்திப்புகள் மிகவும் சிறப்பாகவும் ஆக்கப்பூர்வமாகவும் அமைந்தன என்று அவர் குறிப்பிட்டுள்ளார்.
மேலும், “இரு நாடுகளின் வணிகங்கள், விவசாயிகள், தொழிலாளர்கள் மற்றும் நுகர்வோருக்கு உண்மையான பலன்களைத் தரும் ஒரு சமநிலையான மற்றும் வணிக ரீதியாக அர்த்தமுள்ள ஒப்பந்தத்தை எட்டுவதில் இரு நாடுகளும் முழு அர்ப்பணிப்புடன் உள்ளன. அதற்காக எங்கள் குழுக்கள் தொடர்ந்து இணைந்து செயல்பட்டு வருகின்றன” என்று அமைச்சர் கோயல் தெளிவுபடுத்தியுள்ளார்.
அமெரிக்க அதிபர் டொனால்ட் டிரம்பின் நிர்வாகம் இந்த மாத இறுதியில் புதிய வர்த்தக வரிகளை அமல்படுத்தத் திட்டமிட்டுள்ள சூழலில், இந்தப் பேச்சுவார்த்தை முக்கியத்துவம் பெறுகிறது. தற்போது பெரும்பாலான இந்திய ஏற்றுமதிகளுக்கு அமெரிக்கா 10% அடிப்படை வரியை விதித்து வருகிறது. இந்தியா தனது விவசாயத் துறை மற்றும் குறு, சிறு, நடுத்தரத் தொழில்களைப் பாதுகாப்பதில் உறுதியாக இருக்கும் அதே வேளையில், பரஸ்பர நன்மை தரும் ஒரு சுமுகமான வர்த்தக உடன்பாட்டை எட்டவே அமெரிக்காவுடன் தொடர்ந்து பேச்சுவார்த்தை நடத்தி வருகிறது.
இதேபோன்று அமெரிக்க அரசின் செய்தித் தொடர்பாளர் குஷ் தேசாயும், இந்தியாவுடன் வர்த்தக ஒப்பந்தத்தை இறுதி செய்ய டிரம்ப் நிர்வாகம் தொடர்ந்து ஆக்கப்பூர்வமாகச் செயல்பட்டு வருவதாகத் தெரிவித்துள்ளார்.
அமெரிக்கா உடனான வர்த்தக ஒப்பந்தத்தை இந்தியா முடக்குகிறதா? பரவிய வதந்திக்கு பியூஷ் கோயல் கொடுத்த பதிலடி!
