பிரசவத்திற்காக வைத்தியசாலையில் அனுமதிக்கப்பட்ட தாயும், அவர் பெற்றெடுத்த பெண் சிசுவும் அடுத்தடுத்து உயிரிழந்த சம்பவம், அப்பகுதி மக்களிடையே பெரும் சோகத்தையும் கொதிப்பையும் ஏற்படுத்தியுள்ளது. இப்பிரச்சினை மருத்துவ அலட்சியத்தால் ஏற்பட்டதா என்பது குறித்து உறவினர்கள் சந்தேகம் எழுப்பியுள்ளனர்.
ஹசலக, மினிப்பே பகுதியைச் சேர்ந்த 42 வயதுடைய, இரண்டு பிள்ளைகளின் தாயான எச்.எம். ஸ்வர்ணமலா என்பவரே இந்தத் துரதிர்ஷ்டவசமான மரணத்திற்கு உள்ளாகியுள்ளார். கர்ப்பகாலப் பரிசோதனைகளின் போது, சிசுவின் வளர்ச்சி வழமையை விட அதிகமாக இருந்ததால், மருத்துவர்கள் ஆரம்பத்தில் சிசேரியன் அறுவை சிகிச்சை மூலமே பிரசவத்தை மேற்கொள்ள அறிவுறுத்தியிருந்தனர்.
இருப்பினும், மஹியங்கனை வைத்தியசாலையில் அனுமதிக்கப்பட்ட பின்னர், மருத்துவர்கள் சாதாரண பிரசவத்திற்கு (Normal Delivery) வற்புறுத்தி முயற்சி செய்ததாகக் குடும்பத்தினர் குற்றம் சாட்டுகின்றனர். இந்த முயற்சி தோல்வியடைந்த நிலையில், நிலைமை மோசமடைந்ததையடுத்து, அவசர அவசரமாகச் செய்யப்பட்ட சிசேரியன் அறுவை சிகிச்சையின் முடிவில் அந்தப் பெண் சிசு பரிதாபமாக உயிரிழந்தது.
அறுவை சிகிச்சையின் பின்னர், தாயின் உடல்நிலை தீவிரமடைந்ததால் அவர் பதுளை போதனா வைத்தியசாலையின் தீவிர சிகிச்சைப் பிரிவுக்கு (ICU) மாற்றப்பட்டார். அங்கு 11 நாட்கள் உயிருக்குப் போராடிய நிலையில், கடந்த 06 ஆம் திகதி அதிகாலை 5.45 மணியளவில் ஸ்வர்ணமலா சிகிச்சை பலனின்றி உயிரிழந்தார்.
“முறையான திட்டமிடல் இன்றி மருத்துவர்கள் காட்டிய அலட்சியமே இரு உயிர்களைப் பறித்துள்ளது” என உறவினர்கள் கதறித் துடிக்கின்றனர். இது குறித்து சுகாதார அமைச்சு மற்றும் சம்பந்தப்பட்ட அதிகாரிகள் துரிதமான மற்றும் வெளிப்படையான முழுமையான விசாரணையை நடத்த வேண்டும் எனப் பொதுமக்கள் தரப்பிலும் கோரிக்கைகள் வலுத்துள்ளன.
