RON95 பெட்ரோல் மானியத்தை மாற்றுவதற்கான எந்தவொரு நடவடிக்கையும் அரசாங்கத்திற்கு இறுதி முடிவாகவே இருக்கும், ஏனெனில் இது வீட்டுச் செலவுகளில் நேரடி தாக்கத்தை ஏற்படுத்தும் என்று பிரதமர் அலுவலகத்தின் மூத்த பொருளாதார ஆலோசகர் தெரிவித்துள்ளார்.
இந்த விஷயத்தில் மாற்றங்களைச் செய்வதற்குப் பல கொள்கை வழிமுறைகள் இருந்தபோதிலும், அரசாங்கம் இது தொடர்பான எந்தவொரு முடிவையும் தற்போதைக்கு ஒத்திவைத்துள்ளது என்றார் நூர்ஹிஷாம்.
“பெட்ரோல் என்பது மிகவும் உணர்வுபூர்வமான விஷயம், மேலும் இது மக்களின் பணப்பையில் நேரடி தாக்கத்தை ஏற்படுத்துகிறது,” என்று அவர் ‘Keluar Sekejap’ பாட்காஸ்டின் அண்மைக்கால அத்தியாயத்தில் கூறினார்.
“எனவே, பெட்ரோல் மானிய மாற்றங்கள் அனைத்தும் முதலில் தள்ளிப்போடப்படும். அதுவே இறுதி விருப்பங்களில் ஒன்றாக இருக்கும்.”
உலகளாவிய எரிசக்தி விநியோக நெருக்கடிகளுக்கு மத்தியில், அதிக வருமானம் ஈட்டுபவர்களுக்கான RON95 மானியங்களை மறுபரிசீலனை செய்வதற்கான முன்மொழிவை அரசாங்கம் ஆய்வு செய்து வருவதாகப் பிரதமர் அன்வார் இப்ராகிம் கூறியதாக வெளியான தகவல்களுக்குப் பிறகு அவரது இந்த கருத்துக்கள் வெளிவந்துள்ளன.
அதற்குப் பதிலாக, தளவாடத் துறைக்கான மானிய விலையிலான டீசல் கட்டுப்பாட்டு அமைப்பின் (SKDS) கீழ், டீசல் ஒதுக்கீட்டை இறுக்குவது உட்பட பிற செலவுக் குறைப்பு நடவடிக்கைகளில் அரசாங்கம் கவனம் செலுத்தி வருவதாக நூர்ஹிஷாம் கூறினார்.
“நாங்கள் மானிய விலையிலான டீசல் கட்டுப்பாட்டு அமைப்பைத் (SKDS) தொடங்கியபோது, அதிகமாகக் கொடுத்துவிட்டோம். எனவே இப்போது இருக்கும் செயல்பாட்டுத் தரவுகளின் அடிப்படையில் அதை நாங்கள் இறுக்கி வருகிறோம், அதன் மூலம் சேமிப்பு கிடைக்கிறது,” என்று அவர் கூறினார்.
மேற்கு ஆசியாவில் ஏற்பட்ட மோதலைத் தொடர்ந்து, அரசாங்கம் ஏப்ரல் 1 முதல் BUDI95 மானியத் தகுதியை தற்காலிகமாக மாதத்திற்கு 300 லிட்டரிலிருந்து 200 லிட்டராகக் குறைப்பதாக அறிவித்தது.”
“எரிசக்தி விநியோகம் குறித்து நூர்ஹிஷாம் கூறுகையில், பெட்ரோனாஸ் மற்றும் நாட்டின் சொந்த சுத்திகரிப்பு நிலையங்கள் இருப்பதன் மூலோபாய நன்மையைக் குறிப்பிட்டு, மலேசியாவின் கச்சா எண்ணெய் மற்றும் எரிபொருள் இருப்புக்கள் குறைந்தது ஜூலை வரை போதுமானதாக உள்ளன என்றார்.”
எரிபொருளுக்கு அப்பால், நாட்டின் உணவு மற்றும் மருந்து விநியோகச் சங்கிலிகளை ஒரு சிறப்புப் பணிக்குழு வாரந்தோறும் கண்காணித்து வருவதாகக் குறிப்பிட்ட நூர்ஹிஷாம், இந்தச் சூழ்நிலையை மெதுவாக நகரும் ஒரு நெருக்கடி என்று விவரித்தார்.
சுமார் 11% முதல் 15% வரையிலான மருந்துகள் முக்கியமான கட்டத்தில் உள்ளன, அதாவது அவற்றின் எஞ்சிய விநியோகம் 60 நாட்களுக்கும் குறைவாகவே உள்ளது. ஆனால், நமக்கு மாற்றாகப் பயன்படுத்தக்கூடிய மருந்துகள் கைவசம் உள்ளன.
இறக்குமதி செய்யப்படும் தீவனம் மற்றும் உரம் உட்பட விவசாயத் துறைக்கான உற்பத்திச் செலவுகள் தொடர்ந்து அதிகமாக இருந்தபோதிலும், கோழி, முட்டை மற்றும் அரிசி போன்ற அத்தியாவசியப் பொருட்களின் விநியோகம் தற்போதைக்கு சீராக உள்ளது, என்று அவர் கூறினார்.
-fmt
