IPL 2026 : சாய் சுதர்சனின் சதம் வீண்… கோலி, தேவ்தத் படிக்கல் அதிரடியால் குஜராத்தை வென்றது ஆர்.சி.பி. | IPL News (ஐபிஎல் செய்திகள்)

ஐபிஎல் 2026 தொடரின் 34-வது லீக் ஆட்டத்தில் ராயல் சேலஞ்சர்ஸ் பெங்களூரு (RCB) மற்றும் குஜராத் டைட்டன்ஸ் (GT) அணிகள் பெங்களூரு சின்னசாமி மைதானத்தில் மோதின. விறுவிறுப்பாக நடைபெற்ற இந்த ஆட்டத்தில் டாஸ் வென்ற பெங்களூரு அணி முதலில் பந்துவீச்சைத் தேர்வு செய்தது.

முதலில் பேட்டிங் செய்த குஜராத் டைட்டன்ஸ் அணி, நிர்ணயிக்கப்பட்ட 20 ஓவர்களில் 3 விக்கெட் இழப்பிற்கு 205 ரன்கள் என்ற வலுவான ஸ்கோரைக் குவித்தது. அந்த அணியின் தொடக்க வீரர் சாய் சுதர்சன் அபாரமாக விளையாடி 58 பந்துகளில் சதம் அடித்தார். இதில் 11 பவுண்டரிகள் மற்றும் 5 சிக்ஸர்கள் அடங்கும்.

அவருக்கு உறுதுணையாக கேப்டன் சுப்மன் கில் 32 ரன்களும், இறுதியில் அதிரடி காட்டிய ஜேசன் ஹோல்டர் 10 பந்துகளில் 23 ரன்களும் எடுத்தனர். பெங்களூரு தரப்பில் புவனேஷ்வர் குமார், ஹேசில்வுட் மற்றும் சுயாஷ் சர்மா தலா ஒரு விக்கெட்டை வீழ்த்தினர்.

206 ரன்கள் எடுத்தால் வெற்றி என்ற கடினமான இலக்குடன் களம் இறங்கிய ஆர்சிபி அணிக்கு விராட் கோலி மற்றும் தேவ்தத் படிக்கல் ஜோடி சிறப்பான அடித்தளம் அமைத்துக் கொடுத்தது. கோலி 44 பந்துகளில் 81 ரன்கள் விளாசினார். படிக்கல் 27 பந்துகளில் 55 ரன்கள் எடுத்து ஆட்டத்தின் போக்கை மாற்றினார்.

க்ருணல் பாண்ட்யா 23 ரன்கள் சேர்க்க 18.5 ஓவர்களில் 5 விக்கெட்டுகளை இழந்த ஆர்சிபி அணி 206 ரன்கள் எடுத்து வெற்றி பெற்றது.