கோலாலம்பூர்:
ஸ்மார்ட்போன்கள் முதல் போர் விமானங்கள் மற்றும் மின்சார வாகனங்கள் வரை அனைத்திற்கும் தேவையான ‘அரிய வகை கனிமங்கள்’ (Rare Earths) விநியோகத்தில் சீனாவின் ஆதிக்கத்தைக் குறைக்க, மலேசியாவில் உள்ள ‘லைனாஸ்’ (Lynas) ஆலை முக்கியப் பங்காற்றி வருகிறது.
தற்போது உலகின் 90 சதவீத அரிய வகை கனிமங்கள் சந்தையைச் சீனா தனது கட்டுப்பாட்டில் வைத்துள்ளது. இதனால் உலகளாவிய விநியோகச் சங்கிலியில் சீனா எப்போது வேண்டுமானாலும் முட்டுக்கட்டை போடலாம் என்ற அச்சம் நிலவுகிறது.
ஆஸ்திரேலியாவின் சுரங்க ஜாம்பவானான லைனாஸ் நிறுவனம், மலேசியாவின் கெபெங் தொழிற்பேட்டையில் தனது ஆலையை விரிவுபடுத்துவதன் மூலம் இந்தச் சந்தையில் தனது 10 சதவீதப் பங்களிப்பை அதிகரிக்கத் திட்டமிட்டுள்ளது.
கெபெங்கில் அமைந்துள்ள இந்த ஆலை, தற்போது உலகின் மிகப்பெரிய ஒற்றை அரிய வகை கனிம சுத்திகரிப்பு நிலையமாகத் திகழ்கிறது.
இங்கு முக்கியமாக ‘நியோடைமியம்-பிரசியோடைமியம்’ (NdPr) எனப்படும் காந்தப் பொருட்கள் தயாரிக்கப்படுகின்றன. ஒரு மூட்டை NdPr சுமார் 1,00,000 அமெரிக்க டாலர் (சுமார் 4.7 லட்சம் ரிங்கிட்) வரை விற்பனை செய்யப்படுகிறது.
இங்கு சுத்திகரிக்கப்படும் கனிமங்கள் ஜப்பானுக்கு அனுப்பப்பட்டு, அங்கிருந்து விண்வெளி மற்றும் மின்னணுத் துறைகளில் பயன்படுத்தப்படும் அதிநவீன காந்தங்களாக மாற்றப்படுகின்றன.
மேலும் புற்றுநோய் சிகிச்சை மற்றும் மருத்துவ இமேஜிங் துறைகளில் பயன்படுத்தப்படும் இட்ரியம் (Yttrium) மற்றும் லுடீடியம் (Lutetium) போன்ற கனிமங்களையும் சுத்திகரிக்கத் திட்டமிடப்பட்டுள்ளது.
சுற்றுச்சூழல் ஆர்வலர்களின் கவலைகளுக்கு மத்தியில், மலேசிய அரசாங்கம் கடந்த மாதம் லைனாஸ் நிறுவனத்திற்கு மேலும் 10 ஆண்டுகளுக்குச் செயல்பட அனுமதி வழங்கியுள்ளது.
அடுத்த ஐந்து ஆண்டுகளுக்குள் கதிர்வீச்சு கழிவுகளை உருவாக்கும் அனைத்து நடவடிக்கைகளையும் நிறுத்த வேண்டும் என்ற நிபந்தனையுடன் இந்த உரிமம் புதுப்பிக்கப்பட்டுள்ளது.
தனது கழிவுகள் நச்சுத்தன்மையற்றவை என்றும், அவை நிரந்தரக் கழிவு மேலாண்மை மையங்களில் (PDF) பாதுகாப்பாகச் சேமிக்கப்படுவதாகவும் லைனாஸ் நிறுவனம் தெரிவித்துள்ளது.
அமெரிக்கா மற்றும் சீனா இடையிலான வர்த்தகப் போரில் இந்த அரிய வகை கனிமங்கள் ஒரு முக்கிய ஆயுதமாகப் பயன்படுத்தப்படுகின்றன. அடுத்த பத்து ஆண்டுகளில் ஹைட்ரஜன் எரிபொருள் விநியோகச் சங்கிலியில் ஒரு முக்கியப் பங்குதாரராக உருவெடுக்க லைனாஸ் திட்டமிட்டுள்ளது.
சீனாவின் விநியோக ஆதிக்கத்தைத் தகர்க்க மலேசியாவின் இந்த ஆலை சர்வதேச நாடுகளுக்கு ஒரு சிறந்த மாற்றாக மாறும் என்பதில் ஐயமில்லை.
