புதுடெல்லி: வர்த்தக வரி தொடர்பாக பேச அமெரிக்க அதிபர் 4 முறை தொலைபேசியில் அழைத்தும் பிரதமர் மோடி பேச மறுத்ததாக ஜெர்மனி, ஜப்பான் பத்திரிகைகள் செய்தி வெளியிட்டுஉள்ளன.
உலக நாடுகளுக்கு அதிக வரி விதித்து வரும் அமெரிக்க அதிபர் டொனால்டு ட்ரம்ப், இந்தியாவுக்கு 25 சதவீத வரியை விதித்தார். அத்துடன், உக்ரைன் மீது தாக்குதல் நடத்தி வரும் ரஷ்யாவிடம் இருந்து கச்சா எண்ணெய் வாங்குவதால், கூடுதலாக 25 சதவீத வரியை ட்ரம்ப் அறிவித்தார். அதன்படி, இந்தியாவில் இருந்து அமெரிக்காவில் இறக்குமதி செய்யப்படும் பொருட்களுக்கு மொத்தமாக 50 சதவீத வரி விதிக்கப்பட்டது. இந்த வரி விதிப்பு கடந்த 27-ம் தேதி முதல் அமலுக்கு வந்துள்ளது.
ஆனால், வர்த்தக வரி விதிப்பு தொடர்பாக அமெரிக்காவின் நிர்பந்தத்துக்கு அடிபணிய மாட்டோம். எவ்வளவு நெருக்கடிகள் வந்தாலும் இந்திய விவசாயிகள், சிறு வணிகர்களை பாதிக்கவிட மாட்டேன் என்று பிரதமர் மோடி திட்டவட்டமாக கூறி விட்டார். அமெரிக்காவின் வரி விதிப்பால் இந்திய ஏற்றுமதியாளர்களுக்கு பாதிப்பு ஏற்படும். அதை சரிகட்ட பல்வேறு திட்டங்களை மத்திய அரசு எடுத்து வருகிறது.
இந்நிலையில் வரி தொடர்பாக பிரதமர் மோடியிடம் பேச்சுவார்த்தை நடத்த கடந்த சில வாரங்களில் அதிபர் ட்ரம்ப் 4 முறை தொலைபேசியில் அழைத்ததாகவும் பிரதமர் மோடி பேச மறுத்துவிட்டதாகவும் ஜெர்மனியின் பிராங்க்பர்ட் நகரில் இருந்து இருந்து வெளிவரும் பிரபல ‘அல்லெஜிமெய்ன் ஜெய்டங்’ என்ற பத்திரிகை செய்தி வெளியிட்டுள்ளது. இதேபோல், ட்ரம்பிடம் பேச மோடி மறுத்துவிட்டதாக ஜப்பானில் இருந்து வெளிவரும் ‘நிக்கீ ஏசியா’ பத்திரிகையும் செய்தி வெளியிட்டுள்ளது.
இதற்கிடையில், இந்த தகவலை உறுதிப்படுத்த அமெரிக்காவின் வெள்ளை மாளிகை அதிகாரிகள் மறுத்துவிட்டனர். அதேநேரத்தில் பத்திரிகைகளில் வெளிவந்துள்ள செய்திகளை மறுக்கவும் இல்லை. இதுகுறித்து இந்தியாவின் முக்கிய தூதரக அதிகாரி ஒருவர் கூறும்போது, “முக்கிய விவகாரங்களில் தொலைபேசியில் பேசுவது பிரதமர் மோடியின் பாணி இல்லை” என்றார். மத்திய அரசு வட்டாரங்கள் கூறும்போது, “ட்ரம்பிடம் பேசினால், ஊகங்களின் அடிப்படையில் தகவல்கள் திரித்து வெளியிடப்படுகின்றன. அதை தவிர்க்க ட்ரம்பிடம் பிரதமர் மோடி பேசுவதை தவிர்த்திருக்கலாம். ஏனெனில், இந்தியா – பாகிஸ்தான் போரின் போது ட்ரம்ப் கூறிய கருத்துகளை மனதில் வைத்து அவரது தொலைபேசி அழைப்பை தவிர்த்திருக்கலாம்” என்றனர்.
ஆபரேஷன் சிந்தூரின் போது, இந்திய – பாகிஸ்தான் இடையே அணுஆயுத போராக மாறுவதாக இருந்தது. அதை நான்தான் தடுத்தேன் என்று ட்ரம்ப் கூறி வருகிறார். அத்துடன், சர்வதேச அளவில் 7 போர்களை நிறுத்தி இருக்கிறேன் என்றும் ட்ரம்ப் கடந்த சில நாட்களுக்கு முன்னர் கூறினார். இந்நிலையில், இந்தியா – அமெரிக்கா இடையே வர்த்தக வரி தொடர்பாக மோதல் ஏற்பட்டுள்ளது. இந்நிலையில், பிரதமர் மோடி பேச மறுத்துள்ளதால், அதிபர் ட்ரம்ப் கடும் பதற்றமாகி இருப்பதாக கூறப்படுகிறது.
சீன அதிபர் ஜி ஜின்பிங் ரகசிய கடிதம்: சீன அதிபர் ஜி ஜின்பிங் இந்திய குடியரசுத் தலைவர் திரவுபதி முர்முவுக்கு அண்மையில் ரகசிய கடிதத்தை அனுப்பினார். அந்த கடிதத்தில் அமெரிக்காவின் வரி விதிப்பு போரை, இந்தியாவும் சீனாவும் இணைந்து முறியடிப்பது தொடர்பான ஆலோசனைகளை அதிபர் ஜி ஜின்பிங் முன்மொழிந்து உள்ளார். உலகத்தின் நன்மைக்காக ஒன்றிணைந்து செயல்பட வேண்டும் என்றும் அவர் அழைப்பு விடுத்திருக்கிறார்.
ரகசிய கடிதத்தை தொடர்ந்து இந்திய வெளியுறவுத் துறை அமைச்சர் ஜெய்சங்கர் சீனாவுக்கு சென்று அதிபர் ஜி ஜின்பிங்கை சந்தித்தார். இதைத் தொடர்ந்து சீன வெளியுறவுத் துறை அமைச்சர் வாங் யீ டெல்லிக்கு வந்து பிரதமர் நரேந்திர மோடியை சந்தித்துப் பேசினார்.
எல்லைப் பிரச்சினை காரணமாக இந்தியா உட்பட பல்வேறு நாடுகளுடன் சீனா மோதல் போக்கை கடைப்பிடித்து வந்தது. தற்போது தைவானை தவிர்த்து அனைத்து அண்டை நாடுகளுடனும் நட்புறவைப் பேண சீனா முடிவு செய்திருக்கிறது. இது மிகப்பெரிய திருப்புமுனையாக அமையும் என்று எதிர்பார்க்கப்படுகிறது.
