கடந்த ஆகஸ்ட் 31-ஆம் தேதி நிலவரப்படி, பூமிபுத்ரா பொருளாதார உருமாற்றத் திட்டம் 2035 (புத்ரா35) அமலாக்கம் 68.55 சதவீதத்தை எட்டியுள்ளது என்று துணைப் பிரதமர் அகமது ஜாஹித் ஹமிடி தெரிவித்துள்ளார்.
துணைப் பிரதமரும், கிராமப்புற மற்றும் வட்டார வளர்ச்சி அமைச்சருமான ஜாஹித், இன்று தனது முகநூல் பதிவில் இதனைத் தெரிவித்துள்ளார். சம்பந்தப்பட்ட அமைச்சகங்கள் மற்றும் முகமைகளால் மொத்தம் 628 வளர்ச்சித் திட்டங்கள் தொடங்கப்பட்டு, அவற்றில் 214 திட்டங்கள் நிறைவடைந்துள்ளன என்றும், மேலும் 318 திட்டங்கள் அமலாக்கக் கட்டத்தில் உள்ளன என்றும் பெர்னாமா செய்தி நிறுவனம் செய்தி வெளியிட்டுள்ளது.
புத்ரா35 திட்டத்தின் வெற்றியை வெறும் செயல்படுத்தப்பட்ட திட்டங்களின் எண்ணிக்கையை மட்டும் வைத்து மதிப்பிட முடியாது.
பூமிபுத்ராக்களின் பொருளாதார உரிமை, கட்டுப்பாடு மற்றும் போட்டித்திறன் ஆகியவற்றை மேம்படுத்துவதில் நாம் எவ்வளவு தூரம் வெற்றி பெற்றுள்ளோம் என்பதை வைத்தே இதன் அளவுகோல் இருக்க வேண்டும்.
பூமிபுத்ரா பொருளாதாரக் குழுவின் வழிகாட்டுக் குழு கூட்டத்திற்கு ஜாஹித் தலைமை தாங்கினார். இக்கூட்டம், பூமிபுத்ராக்களின் பொருளாதார மீள்திறனை வலுப்படுத்துவதிலும், புத்ரா35 திட்டத்தின் அமலாக்கத்தை விரைவுபடுத்துவதிலும் கவனம் செலுத்தியது.
பூமிபுத்ரா தொழில்முனைவோர் மாநாடு 2035-இல் முன்வைக்கப்பட்ட ஏழு பிரகடனங்களின் தொடர் நடவடிக்கைகள் உட்பட, பூமிபுத்ரா தொழில்முனைவோர் சூழலை வலுப்படுத்துவதற்கான முயற்சிகள் குறித்தும் இக்கூட்டத்தில் விவாதிக்கப்பட்டதாக அவர் கூறினார்.
அந்தப் பிரகடனங்கள், பெண் தொழில்முனைவோரின் வளர்ச்சி, ‘பூமிபுத்ரா வெற்றியாளர்களை’ உருவாக்குதல், ஏற்றுமதிச் சந்தைகளை விரிவுபடுத்துதல் மற்றும் நிர்வாகத்தை வலுப்படுத்துதல் ஆகியவற்றிற்கு முக்கியத்துவம் அளிக்கின்றன.
-fmt
