2-வது டி 20 கிரிக்கெட் போட்டியில் வங்கதேச அணியை 2 விக்கெட்கள் வித்தியாசத்தில் வீழ்த்தியது ஐக்கிய அரபு அமீரக அணி.
ஷார்ஜாவில் நேற்றுமுன்தினம் இரவு நடைபெற்ற இந்த ஆட்டத்தில் முதலில் பேட் செய்த வங்கதேச அணி 20 ஓவர்களில் 5 விக்கெட்கள் இழப்புக்கு 205 ரன்கள் குவித்தது. அதிகபட்சமாக தன்ஸித் ஹசன் 33 பந்துகளில், 3 சிக்ஸர்கள், 8 பவுண்டரிகளுடன 59 ரன்கள் விளாசினார். தவுஹித் ஹிர்டோய் 45, கேப்டன் லிட்டன் தாஸ் 40 ரன்கள் சேர்த்தனர்.
ஐக்கிய அரபு அமீரகம் அணி சார்பில் ஜவாதுல்லா 3, சாகிர் கான் 2 விக்கெட்கள் வீழ்த்தினர். 206 ரன்கள் இலக்குடன் பேட் செய்த ஐக்கிய அரபு அமீரக அணி 19.5 ஓவர்களில் 8 விக்கெட்களை இழந்து வெற்றி பெற்றது. அதிகபட்சமாக கேப்டன் முகமது வசீம் 42 பந்துகளில், 5 சிக்ஸர்கள், 9 பவுண்டரிகளுடன் 82 ரன்கள் விளாசினார். முகமது ஸோஹயிப் 38, ஆசிப் கான் 19 ரன்கள் சேர்த்தனர். ஹைதர் அலி 15, மதியுல்லா கான் 1 ரன்னுடன் களத்தில் இருந்தனர்.
டி 20 கிரிக்கெட் போட்டியில் வங்கதேச அணியை ஐக்கிய அரபு அமீரக அணி வீழ்த்துவது இதுவே முதன்முறையாகும். ஐக்கிய அரபு அமீரகத்தின் வெற்றிக்கு கடைசி 11 பந்துகளில் 29 ரன்கள் தேவையாக இருந்தது. 19-வது ஓவரை வீசிய ஷோரிபுல் இஸ்லாம் 17 ரன்களை தாரைவார்த்தார். துருவ் பிரஷார் பவுண்டரி அடித்த நிலையில் ஹைதர் அலி சிக்ஸர் விளாசினார். கடைசி பந்தில் வங்கதேச அணி ஓவர்த்ரோவில் 5 ரன்களை அள்ளிக் கொடுத்தது.
தன்ஸிம் ஹசன் வீசிய கடைசி ஓவரில் வெற்றிக்கு 11 ரன்கள் தேவையாக இருந்த நிலையில் துருவ் பிரஷார் (11), 2-வது பந்தில் சிக்ஸர் விளாசிய நிலையில் அடுத்த பந்தில் போல்டானார். எனினும் ஹைதர் அலி நிதானமாக விளையாடி வெற்றியை வசப்படுத்த உதவினார்.
2 விக்கெட்கள் வித்தியாசத்தில் வெற்றி பெற்ற ஐக்கிய அரபு அமீரக அணி 3 ஆட்டங்கள் கொண்ட டி 20 கிரிக்கெட் தொடரை 1-1 சமநிலைக்கு கொண்டு வந்துள்ளது. முதல் டி 20 போட்டியில் வங்கதேச அணி 27 ரன்கள் வித்தியாசத்தில் வெற்றி கண்டிருந்தது. 3-வது மற்றும் கடைசி போட்டி இன்று (21-ம் தேதி) நடைபெறுகிறது.
