2 ஆவது ஒருநாள் போட்டியில் அபார வெற்றி.. ஆப்கானிஸ்தானுக்கு எதிரான தொடரை வென்றது இந்திய அணி | கிரிக்கெட் செய்திகள்

இந்தியாவில் சுற்றுப்பயணம் மேற்கொண்டுள்ள ஆப்கானிஸ்தான் கிரிக்கெட் அணி 3 போட்டிகள் கொண்ட ஒருநாள் தொடரில் விளையாடி வருகிறது. 2-ஆவது ஒருநாள் போட்டி லக்னோ ஏகானா கிரிக்கெட் மைதானத்தில் நடைபெற்றது.

இப்போட்டியில் டாஸ் வென்ற ஆப்கானிஸ்தான் அணி முதலில் பந்துவீச்சை தேர்வு செய்தது. அதன்படி முதலில் பேட்டிங் செய்த இந்திய அணி, கேப்டன் ஷுப்மன் கில் மற்றும் விக்கெட் கீப்பர் இஷான் கிஷன் ஆகியோரின் அதிரடி சதங்களின் உதவியோடு 49.5 ஓவர்களில் அனைத்து விக்கெட்டுகளையும் இழந்து 402 ரன்கள் என்ற இமாலய இலக்கை எட்டியது.

இதையடுத்து 403 ரன்கள் எடுத்தால் வெற்றி என்ற கடினமான இலக்குடன் களம் இறங்கிய ஆப்கானிஸ்தான் அணி, இந்திய வீரர்களின் துல்லியமான பந்துவீச்சை எதிர்கொள்ள முடியாமல் 44.3 ஓவர்களில் 232 ரன்களுக்கு அனைத்து விக்கெட்டுகளையும் இழந்து சுருண்டது. இதன் மூலம் இந்திய அணி 170 ரன்கள் வித்தியாசத்தில் மாபெரும் வெற்றியைப் பதிவு செய்துள்ளது.

முன்னதாக இந்திய அணிக்கு தொடக்க வீரர்களான யஷஸ்வி ஜெய்ஸ்வால் (9 ரன்கள்) மற்றும் ரோஹித் சர்மா (48 ரன்கள்) ஜோடி பெரிய அளவில் ரன் குவிக்காமல் ஆட்டமிழந்தது. எனினும், 3-ஆவது விக்கெட்டுக்கு ஜோடி சேர்ந்த கேப்டன் ஷுப்மன் கில் மற்றும் இஷான் கிஷன் ஆப்கான் பந்துவீச்சை நாலாபுறமும் சிதறடித்தனர்.

இப்போட்டியில் மிரட்டலான ஆட்டத்தை வெளிப்படுத்திய ஷுப்மன் கில் 102 பந்துகளில் 154 ரன்களும் (22 பவுண்டரிகள், 2 சிக்ஸர்கள்), இஷான் கிஷன் 79 பந்துகளில் 125 ரன்களும் (14 பவுண்டரிகள், 7 சிக்ஸர்கள்) குவித்து அசத்தினர். இந்த ஜோடி 3-ஆவது விக்கெட்டுக்கு 224 ரன்கள் பார்ட்னர்ஷிப் அமைத்து அசத்தியது. இறுதியில் மிடில் ஆர்டர் வரிசை சரிந்த போதிலும் இந்தியா 402 ரன்களை எட்டியது.

ஆப்கானிஸ்தான் தரப்பில் நங்கேயாலியா கரோட்டி அதிகபட்சமாக 4 விக்கெட்டுகளைக் கைப்பற்றினார்.

இமாலய இலக்கை நோக்கி விளையாடிய ஆப்கானிஸ்தான் அணிக்கு தொடக்க வீரர் ரஹ்மானுல்லா குர்பாஸ் 33 பந்துகளில் 41 ரன்கள் எடுத்து நல்ல தொடக்கம் கொடுத்தார். மற்றொரு தொடக்க வீரர் இப்ராகிம் சத்ரான் 21 ரன்களில் ஆட்டமிழந்தார்.

அதன் பின் வந்த செடிகுல்லா அடல் 42 ரன்கள் எடுத்து அவுட் ஆனார். மிடில் ஆர்டரில் ரஹ்மத் ஷா மட்டும் ஒருபுறம் பொறுப்புடன் விளையாடி 89 பந்துகளில் 79 ரன்கள் (8 பவுண்டரிகள்) எடுத்து இறுதிவரை போராடினார். கேப்டன் ஹஷ்மத்துல்லா ஷாஹிதி 4 ரன்களிலும், ரஷித் கான் 12 ரன்களிலும் ஆட்டமிழந்து ஏமாற்றினர். தர்விஷ் ரசூலி 6 ரன்கள் எடுத்திருந்த போது ‘ரிட்டையர்ட் அவுட்’ (Retired out) முறையில் வெளியேறினார். இறுதி கட்டத்தில் மற்ற வீரர்கள் சொற்ப ரன்களில் ஆட்டமிழக்க, ஆப்கானிஸ்தான் அணி 232 ரன்களுக்கு ஆல்-அவுட் ஆனது.