15 ஆண்டுகளுக்கு பின்னர் டெஸ்டில் சாதனை படைத்த இந்திய அணி… குவியும் பாராட்டு

15 ஆண்டுகளுக்கு பிறகு டெஸ்ட் தொடரில் இந்திய அணி சாதனை ஒன்றை ஏற்படுத்தியுள்ளது. இதையொட்டி பல்வறு கிரிக்கெட் ஜாம்பவான்கள் இந்திய அணிக்கு பாராட்டு தெரிவித்து வருகின்றனர்.

இங்கலாந்துக்கு எதிரான 5 ஆவது மற்றும் கடைசி டெஸ்ட் கிரிக்கெட் போட்டியில் இந்திய அணி வலுவான நிலையில் உள்ளது. இன்றைய 2 ஆம் நாள் ஆட்ட நேர முடிவில் இங்கிலாந்தை விடவும் இந்திய அணி முதல் இன்னிங்ஸில் 255 ரன்கள் முன்னிலை பெற்றுள்ளது.

இந்தியாவில் சுற்றுப் பயணம் மேற்கொண்டுள்ள இங்கிலாந்து அணி 5 போட்டிகள் கொண்ட டெஸ்ட் கிரிக்கெட் தொடரில் விளையாடி வருகிறது. ஏற்கனவே நடந்து முடிந்த 4 டெஸ்ட் போட்டிகளில் இந்திய அணி 3 போட்டிகளில் வெற்றி பெற்று தொடரை வென்றுள்ளது.

தற்போது 5 ஆவது டெஸ்ட் கிரிக்கெட் போட்டி இமாசல பிரதேச மாநிலம் தர்மசாலாவில் நடைபெற்று வருகிறது. டாஸ் வென்ற இங்கிலாந்து அணி பேட்டிங்கை தேர்வு செய்தது. 57.4 ஓவர்கள் விளையாடிய இங்கிலாந்து அணியின் பேட்ஸ்மேன்கள் 218 ரன்கள் மட்டுமே சேர்த்தனர். அதிகபட்சமாக அந்த அணியின் ஸாக் க்ராவ்லே 79 ரன்கள் எடுத்தார். இந்திய அணி தரப்பில் குல்தீப் யாதவ் 5 விக்கெட்டுகளையும், அஷ்வின் 4 விக்கெட்டுகளையும் வீழ்த்தினர்.

இதையடுத்து முதல் இன்னிங்சை தொடங்கிய இந்திய அணி வீரர்கள் சிறப்பாக விளையாடி ரன்களை சேர்த்தனர். யஷஸ்வி ஜெய்ஸ்வால் 57 ரன்களும், கேப்டன் ரோஹித் சர்மா 103 ரன்களும், சுப்மன் கில் 110 ரன்களும் எடுத்தனர்.

தேவ்தத் படிக்கல் 65 ரன்களும், சர்ப்ராஸ் கான் 56 ரன்களும் எடுத்து ஸ்கோர் உயர உதவினர். இன்றைய 2 ஆம் நாள் ஆட்ட நேர முடிவில் இந்திய அணி 8 விக்கெட் இழப்புக்கு 473 ரன்கள் எடுத்துள்ளது. குல்தீப் யாதவ் 27 ரன்களும், ஜஸ்பிரித் பும்ரா 19 ரன்களும் எடுத்து களத்தில் உள்ளனர்.

இந்திய அணி முதல் இன்னிங்ஸில் இங்கிலாந்தை விடவும் 255 ரன்கள் முன்னிலை பெற்றுள்ளது. அந்த வகையில் இந்திய அணியின் முதல் 5 பேட்ஸ்மேன்களும் 50 ரன்களை கடந்தனர். முன்னதாக 2009 இல் இதேபோன்ற சாதனையை இலங்கை அணிக்கு எதிராக இந்தியா ஏற்படுத்தியது. அதன்பின்னர் 15 ஆண்டுகளுக்கு பிறகு அதேபோன்ற சாதனையை நிகழ்த்தியுள்ளது இந்திய அணி.

இங்கிலாந்து அணிக்கு எதிரான டெஸ்ட் போட்டியில் இந்திய அணியின் முதல் 5 வீரர்கள் அரைச்சதம் கடந்தது என்பது இதுவே முதன்முறையாகும்.

உலகம் முதல் உள்ளூர் வரை இன்றைய முக்கிய செய்திகள் (Top Tamil News, Breaking News), அண்மைச் செய்திகள் (Latest Tamil News), அனைத்தையும் நியூஸ்18 தமிழ் (News18Tamil.com) இணையதளத்தில் உடனுக்குடன் அறியலாம். News 18 தமிழ் : வாட்ஸ் அப் சேனலை ஃபாலோ செய்யுங்கள்.
நியூஸ்18 தமிழ்நாடு தொலைக்காட்சியை, ARASU CABLE – 46, TCCL – 57, SCV – 28, VK Digital – 30, SUN DIRECT DTH: 71, TATA PLAY: 1562, D2H: 2977, AIRTEL: 782, DISH TV:2977 ஆகிய அலைவரிசைகளில் காணலாம்…