ஹரக் கட்டா எனப் பிரபலமாக அறியப்படும் நதுன் சிந்தக விக்ரமரத்னவின் உயிருக்கு சிறையில் வைத்து அச்சுறுத்தல் இருப்பதாகக் கூறி, அவரது தந்தை நெல்சன் மெர்வின் விக்ரமரத்ன இலங்கை மனித உரிமைகள் ஆணைக்குழுவில் முறைப்பாடு செய்துள்ளார்.
மனித உரிமைகள் ஆணைக்குழுவின் செயலாளருக்கு அனுப்பியுள்ள கடிதத்தில், தனது மகன் வெலிசறை கடற்படை முகாமுக்குள் உள்ள 10 அறைகள் கொண்ட தடுப்பு நிலையத்தில் தடுத்து வைக்கப்பட்டுள்ளதாக நெல்சன் மெர்வின் விக்ரமரத்ன தெரிவித்துள்ளார்.
அதே தடுப்பு நிலையத்தில், பாதாள உலகக் குழுவைச் சேர்ந்த கேஹெல்பத்தர பத்மே, பக்கோ சமன் மற்றும் பாணந்துறை நிலங்க ஆகிய மூவரும் தடுத்து வைக்கப்பட்டுள்ளதாகவும் அவர் குறிப்பிட்டுள்ளார்.
இவர்கள் முன்னதாக நீதிமன்ற வளாகத்திலேயே தனது மகனை கொலை செய்ய முயன்றதாக குற்றச்சாட்டுகளை எதிர்கொண்டவர்கள் என்றும் அவர் தெரிவித்துள்ளார்.
செப்டெம்பர் 22ஆம் திகதி தனது மகனுக்கும் பத்மேவுக்கும் இடையில் மோதல் இடம்பெற்றதாக வெளியாகியுள்ள ஊடகச் செய்திகள் உண்மைக்கு புறம்பானவை எனக் கூறியுள்ள அவர், இந்தச் சம்பவத்தை அடிப்படையாகக் கொண்டு தனது மகன் மீது உயிருக்கு ஆபத்தான தாக்குதல் நடத்துவதற்கான சூழல் உருவாக்கப்படுவதாக அச்சம் வெளியிட்டுள்ளார்.
தனது மகன் முழங்கால் காயத்தால் பாதிக்கப்பட்டு, ஊன்றுகோல் உதவியுடன் நடப்பதாகவும், தடுப்பில் வைக்கப்பட்டுள்ள சூழ்நிலைகளால் அவரது உடல்நிலை மோசமடைந்து வருவதாகவும் அவர் தெரிவித்துள்ளார்.
மேலும், அரசின் பரவலான ஊழல் தொடர்பான தகவல்களை வெளிப்படுத்த தனது மகன் தயாராக இருப்பதே அவரது உயிருக்கு அச்சுறுத்தல் ஏற்படுவதற்கான காரணம் எனவும் நெல்சன் மெர்வின் விக்ரமரத்ன குற்றம்சாட்டியுள்ளார்.
தனது மகனின் உயிர் வாழும் உரிமையைப் பாதுகாக்கவும், சட்டவிரோதமான பாதிப்புகளுக்கு பதிலாக சட்டத்தின் உரிய நடைமுறையின் ஊடாக அவர் நடத்தப்படுவதை உறுதி செய்யவும் மனித உரிமைகள் ஆணைக்குழு உடனடியாக தலையிட வேண்டும் என நெல்சன் மெர்வின் விக்ரமரத்ன கோரிக்கை விடுத்துள்ளார். (a)
