முன்னாள் ஜனாதிபதி மகிந்த ராஜபக்சவின் மனைவியான ஷிரந்தி ராஜபக்சவுக்கு எதிராக வெளிநாட்டுப் பயணத் தடையைப் பெறுவதற்கு நடவடிக்கை எடுக்கப்படும் என பொதுமக்கள் பாதுகாப்பு அமைச்சின் மூலாதாரங்களை மேற்கோள்காட்டி தென்னிலங்கை ஊடகமொன்று செய்தி வெளியிட்டுள்ளது.
வழங்கப்பட்டுள்ள நீடிக்கப்பட்ட கால அவகாசம் முடிவடைவதற்கு முன்னர் காவல்துறை நிதிச் குற்றப் புலனாய்வுப் பிரிவின் (FCID) முன்பு முன்னிலையாக தவறினால் இந்நடவடிக்கை எடுக்கப்படும் என அதில் தெரிவிக்கப்பட்டுள்ளது.
தற்போது மருத்துவ சிகிச்சைக்காக வெளிநாடு சென்றுள்ள ஷிரந்தி ராஜபக்ச, தான் தலைவராக வகித்த சிரிலிய (Siriliya Saviya) அறக்கட்டளை தொடர்பான நிதி முறைகேடுகள் குறித்து வாக்குமூலம் அளிப்பதற்காக 14 நாட்கள் கால அவகாசம் கோரியிருந்தார்.
வெளிநாட்டுப் பயணத் தடை
இந்தநிலையில் ஷிரந்தி ராஜபக்ச கடந்த செப்டம்பர் 16 ஆம் திகதி சிங்கப்பூருக்குப் புறப்பட்டார்.
இதையடுத்து கட்டுநாயக்க விமான நிலையத்தில் வைத்துச் செயற்பட்ட நிதிச் குற்றப் புலனாய்வுப் பிரிவு அதிகாரிகள் செப்டம்பர் 24 ஆம் திகதி விசாரணைக்கு முன்னிலையாகுமாரு அவரிடம் அறிவித்தலை ஒப்படைத்திருந்தனர்.
இருப்பினும், வழங்கப்பட்ட நிவாரணக் கால அவகாசத்திற்குள் அவர் விசாரணை அதிகாரிகளின் முன்னிலையில் முன்னிலையாக தவறினால் அவருக்கு எதிராக நீதிமன்றத்தினூடாக வெளிநாட்டுப் பயணத் தடையைப் பெற காவல்துறையினர் எதிர்பார்ப்பதாக தெரிவிக்கப்படுகின்றது.
அவ்வாறு தடை உத்தரவு பிறப்பிக்கப்பட்டால் அவர் மீண்டும் நாட்டிற்குத் திரும்பும் போது விமான நிலையத்திலேயே கைது செய்யப்படக்கூடிய அபாயம் உள்ளதாக தகவல்கள் வெளியாகியுள்ளன.
இது தொடர்பாகக் கருத்துத் தெரிவித்துள்ள சிறிலங்கா பொதுஜன பெரமுனவின் பேச்சாளர் ஒருவர், அவர் நாட்டிற்குத் திரும்புவதற்குத் தற்காலிகத் திகதி ஒன்று அறிவிக்கப்பட்டிருந்த போதிலும் அவர் மருத்துவ சிகிச்சைக்காகவே வெளிநாடு சென்றுள்ளதால் அவர் மீண்டும் திரும்பும் திகதியானது மருத்துவ ஆலோசனைகள் மற்றும் தேவைகளின் அடிப்படையில் மட்டுமே தீர்மானிக்கப்படும் என தெரிவித்துள்ளமை குறிப்பிடத்தக்கது.
செய்திகளை உடனுக்குடன் தெரிந்து கொள்ள IBC தமிழ் WHATSAPP இல் இணைந்து கொள்ளுங்கள்…! |
