ஷா ஆலாம், பிப்ரவரி 16, 2026:
இன்று மதியம் பெய்த பலத்த மழை மற்றும் காற்றின் காரணமாக, செக்சன் 7-இல் உள்ள பெர்சியாரன் துன் அர்ஷாத் அயூப் (Persiaran Tun Arshad Ayub) சாலையில் இருந்த மரம் ஒன்று திடீரெனச் சாய்ந்தது.
மரம் விழுந்த வேகத்தில் கருப்பு நிற மிட்சுபிஷி எக்ஸ்பாண்டர் (Mitsubishi Xpander) ரக MPV காரின் மேற்கூரை கடுமையாக நசுங்கியது.
மதியம் 12:11 மணிக்குத் தீயணைப்புத் துறைக்குத் தகவல் கிடைத்தது. ஷா ஆலாம் தீயணைப்பு நிலையத்திலிருந்து 12 வீரர்கள் இரண்டு வாகனங்களில் 12:16 மணிக்கே சம்பவ இடத்திற்கு விரைந்தனர். காரின் இரும்பு பாகங்களை வெட்டி எடுத்து, உள்ளே சிக்கியிருந்த இரு பெண்களையும் வீரர்கள் பத்திரமாக மீட்டனர்.
பாதிக்கப்பட்ட நூர் ஷாஹிதா அப்துல் அஜிஸ் (39 வயது) என்பவருக்கு முகம் மற்றும் தலைப் பகுதியில் காயங்கள் ஏற்பட்டுள்ளன. மற்றைய பெண்ணான ஷரீனா ஃபைரூஸ் அப்துல் மனாஃப் (42 வயது) என்பவருக்கு இடுப்புப் பகுதியில் காயம் ஏற்பட்டுள்ளது.
காயமடைந்த இருவரும் முதலுதவிக்குப் பின் மேலதிக சிகிச்சைக்காக ஷா ஆலாம் மருத்துவமனைக்கு அனுப்பி வைக்கப்பட்டனர். விபத்தைத் தொடர்ந்து அந்தச் சாலையில் போக்குவரத்து நெரிசல் ஏற்பட்டது. தீயணைப்பு வீரர்கள் மற்றும் மாநகராட்சி ஊழியர்கள் விழுந்த மரத்தை அகற்றும் பணியில் ஈடுபட்டனர்.
மலேசிய வானிலை ஆய்வு மையம் (MetMalaysia) இன்று மாலை 6:00 மணி வரை பல மாநிலங்களில் இடியுடன் கூடிய கனமழை பெய்யக்கூடும் என எச்சரிக்கை விடுத்துள்ள நிலையில், வாகன ஓட்டிகள் மரங்கள் மற்றும் விளம்பரப் பலகைகள் உள்ள பகுதிகளில் மிகுந்த எச்சரிக்கையுடன் இருக்குமாறு அறிவுறுத்தப்படுகிறார்கள்.
