ஹைதராபாத்: ஐபிஎல் சீசனின் 55-வது லீக் போட்டியில் இன்று டெல்லி கேப்பிடல்ஸ், சன்ரைசர்ஸ் ஹைதராபாத் அணிகள் மோதவுள்ளன.
ஹைதராபாத்திலுள்ள ராஜீவ் காந்தி சர்வதேச மைதானத்தில் இந்தப் போட்டி இன்று இரவு 7.30 மணிக்கு நடைபெறவுள்ளது. டெல்லி அணி இதுவரை 10 போட்டிகளில் விளையாடி 6 வெற்றி, 4 தோல்விகளைப் பெற்று 12 புள்ளிகளைச் சேர்த்துள்ளது. அந்த அணி வெற்றிப் பாதைக்குத் திரும்ப வேண்டிய கட்டாயத்தில் உள்ளது.
அந்த அணியின் அபிஷேக் போரல், டூ பிளெஸ்ஸிஸ், கருண் நாயர், கே.எல்.ராகுல், அக்சர் படேல், டிரிஸ்டன் ஸ்டப்ஸ், விப்ராஜ் நிகம் ஆகியோர் பேட்டிங்கில் பலம் சேர்க்கின்றனர். அதேபோல் பந்துவீச்சில் ஸ்டார்க், சமீரா, முகேஷ் குமார், அக்சர் படேல், குல்தீப் யாதவ் சிறப்பாக பந்துவீசினால் மட்டுமே வெற்றி வசப்படும்.
அதேநேரத்தில் ஹைதராபாத் அணி 10 ஆட்டங்களில் பங்கேற்று 3 வெற்றி, 7 தோல்விகளைப் பெற்று 6 புள்ளிகளுடன் பட்டியலில் 9-வது இடத்தில் உள்ளது. ஹைதராபாத் அணியின் பேட்டிங் வரிசை டிராவிஸ் ஹெட், அபிஷேக் சர்மா, இஷான் கிஷான், ஹென்ரிச் கிளாசன், அனிக்கெட் வர்மா, நித்திஷ் குமார் ரெட்டி, கமிந்து மெண்டிஸ் என வலுவாக உள்ளது. எனவே, டெல்லி பந்துவீச்சாளர்களுக்கு இவர்கள் கடும் நெருக்கடி தருவார்கள் என்பதில் சந்தேகமில்லை.
அதேபோல் பந்துவீச்சில் முகமது ஷமி, ஜெயதேவ் உனத்கட், பாட் கம்மின்ஸ், ஹர்ஷல் படேல், ஜீஷன் அன்சாரி, கமிந்து மெண்டிஸ் ஆகியோர் உயர்மட்ட செயல்திறனை வெளிப்படுத்தக் காத்திருக்கின்றனர்.
