வீட்டு கடனுக்கான மாதாந்திர தவணை தொகையை செலுத்த தவறினால் இதுதான் நடக்கும்.. அவசியம் தெரிஞ்சுக்கோங்க! | வணிகம்

உங்களுக்கு வரும் முதல் சங்கடம், தாமதமாக செலுத்தியதற்கான அபராதம். நீங்கள் ஒரு சில நாட்கள் தாமதமாகச் செலுத்தினாலும் கூட, வங்கிகள் அதைச் சாதாரணமாக எடுத்துக்கொள்வதில்லை. இந்த அபராதத் தொகை சிறியதாகத் தோன்றினாலும், வேறு எதற்காவது பயன்படுத்தக்கூடிய தொகை இப்படி வீணாக செலவாகும். மேலும் வங்கிகள் உங்களின் கிரெடிட் ஸ்கோரில் கை வைப்பார்கள் என்பதையும் நியாபகத்தில் வைத்துக்கொள்ளுங்கள்.

நீங்கள் செய்யக்கூடிய சிறிய தவறு இங்குதான் பெரிய பாதிப்பை ஏற்படுத்துகின்றன. நீங்கள் செலுத்தாமல் தவறவிட்ட இஎம்ஐ உடனடியாக கடன் நிறுவனங்களுக்குத் தெரிவிக்கப்படும். ஒரு முறை தவறவிட்டாலும் கூட உங்கள் கிரெடிட் ஸ்கோர் குறையக்கூடும். மேலும் மீண்டும் மீண்டும் தாமதமாக செலுத்தினால், அதிகமாக குறையும். பெரும்பாலும் வீட்டுக் கடன்கள் பெரிய தொகை என்பதோடு நீண்ட கால கடன்கள் என்பதால், கடன் வழங்குபவர்கள் எந்தவொரு தவணைத் தவறுதலையும் எச்சரிக்கையாகக் கருதுகிறார்கள். ஆகவே மற்றொரு கடனையோ அல்லது புதிய கிரெடிட் கார்டு வாங்குவதையோ இது கடினமாக்குகிறது.

இஎம்ஐ தொகையை செலுத்தாமல் தவறவிடும் பட்சத்தில், அந்த தொகை எங்கும் மறைந்துவிடாது. அது அடுத்த மாத தவணையில் சேர்கிறது. மேலும் அதற்கான வட்டியும் அதிகரித்துக்கொண்டே செல்கிறது. காலப்போக்கில் இந்தக் கூடுதல் சுமை நீங்கள் திருப்பிச் செலுத்தும் அட்டவணையை அதிகமாக்கி, நீங்கள் கடன் வாங்கிய போது இருந்ததை விட அதிக விலை கொண்டதாக மாற்றும்.

வங்கிகள் பொறுமையை கடைபிடிக்கும். ஆனால் தொடர்ச்சியாக மூன்று இஎம்ஐ-களை செலுத்தாமல் இருந்தால், உங்கள் கடன் செயல்படாத சொத்தாக வகைப்படுத்தப்படலாம். அப்போதுதான் வீட்டை ஜப்தி செய்யக்கோரும் நோட்டீஸ் உங்கள் வீட்டுக்கு வரும். அதன்பிறகும் ஒழுங்காக செலுத்தவில்லை என்றால், நிலுவைத் தொகையை வசூலிக்க சொத்தை விற்க வங்கிக்கு உரிமை உண்டு.