Last Updated:
Free Silt Scheme| விழுப்புரம் மாவட்ட ஏரிகள் மற்றும் குளங்களில் இருந்து விவசாயிகள் இலவசமாக வண்டல் மண் மற்றும் களிமண் எடுத்து பயன்படுத்தலாம் என மாவட்ட ஆட்சியர் அறிவிப்பு வெளியிட்டுள்ளார்.
விழுப்புரம் மாவட்டத்தில் உள்ள விவசாயிகள் தங்களது விவசாய நிலங்களை செம்மைப்படுத்தவும், மண்பாண்டத் தொழிலுக்கான பயன்பாட்டிற்காகவும், தங்களது கிராமம் அமைந்துள்ள வட்டத்திற்குட்பட்ட பகுதிகளில் உள்ள நீர்வளத்துறை மற்றும் ஊரக வளர்ச்சித்துறை கட்டுப்பாட்டிலுள்ள ஏரிகள் மற்றும் குளங்களில் படிந்துள்ள வண்டல் மண் மற்றும் களிமண்ணை இலவசமாக எடுத்து பயன்படுத்திக் கொள்ளலாம் என மாவட்ட நிர்வாகம் அறிவித்துள்ளது.
மேலும், ஏரிகள் மற்றும் குளங்களில் உள்ள வண்டல் மண்ணை அகற்றுவதன் மூலம் நீர்நிலைகளின் நீர்தேக்க திறனும் அதிகரிக்கும் என தெரிவிக்கப்பட்டுள்ளது. தமிழ்நாடு அரசின் இந்த திட்டத்தின் கீழ், தகுதிவாய்ந்த ஏரிகளின் விவரங்கள் Government of Tamil Nadu அரசிதழ் சிறப்பு வெளியீட்டில் வெளியிடப்பட்டுள்ளதாக கூறப்பட்டுள்ளது.
அதன்படி, நன்செய் நிலங்களுக்கு ஏக்கருக்கு 75 கன மீட்டர், புன்செய் நிலங்களுக்கு ஏக்கருக்கு 90 கன மீட்டர், வீட்டு பயன்பாட்டிற்கு 30 கன மீட்டர் மற்றும் மண்பாண்டத் தொழில் செய்பவர்களுக்கு 60 கன மீட்டர் அளவில் வண்டல் மண் மற்றும் களிமண்ணை இலவசமாக எடுத்துச் செல்ல அனுமதி வழங்கப்பட்டுள்ளது. மேலும், விவசாய நிலங்களுக்கு இரண்டு ஆண்டுகளுக்கு ஒருமுறை இந்த சலுகையை பெறலாம் என்றும் தெரிவிக்கப்பட்டுள்ளது.
மேலும், வண்டல் மண் தேவைப்படும் விவசாயிகள் தங்களது நில விவரங்களையும், மண்பாண்டத் தொழிலாளர்கள் தங்களது தொழில் தொடர்பான விவரங்களையும் பதிவு செய்து, TN e-Sevai Portal இணையதளம் மூலம் விண்ணப்பித்து வட்டாட்சியரிடம் அனுமதி பெறலாம். இந்த வாய்ப்பை விவசாயிகளும் பொதுமக்களும் முழுமையாக பயன்படுத்திக் கொள்ள வேண்டும் என Sheikh Abdul Rahman தெரிவித்துள்ளார்.
May 26, 2026 11:36 AM IST
