இந்தியாவின் Ahmedabad நகரில் இடம்பெற்றதாக கூறப்பட்ட துப்பாக்கி விபத்து ஒன்று, உண்மையில் திட்டமிட்ட கொலையென தடயவியல் சோதனையில் உறுதிப்படுத்தப்பட்டுள்ள சம்பவம் பெரும் அதிர்ச்சியை ஏற்படுத்தியுள்ளது. Gujarat Maritime Board-இல் உயர்மட்ட அதிகாரியாக பணியாற்றிய ஒருவர், தனது மனைவியை திட்டமிட்டு சுட்டுக் கொன்ற பின்னர் தன்னுயிரை மாய்த்துக்கொண்டதாக விசாரணைகள் தெரிவிக்கின்றன.
ஆரம்பத்தில், துப்பாக்கியை சுத்தப்படுத்தும் போது அல்லது கையாளும் போது தற்செயலாக வெடித்ததில் மனைவி உயிரிழந்ததாக அந்த அதிகாரி கூறியிருந்தார். மேலும், அவர் Shaktisinh Gohil என்ற குஜராத் காங்கிரஸ் நாடாளுமன்ற உறுப்பினரின் உறவினர் என்பதும் குறிப்பிடப்பட்டது. ஆனால், தடயவியல் ஆய்வக அறிக்கைகள் இந்தக் கதையை முற்றிலும் நிராகரித்துள்ளன.
காவல்துறை மேற்கொண்ட ஆய்வில், நவீன ரக துப்பாக்கிகள் தானாக வெடிக்கும் வாய்ப்பு இல்லை என்றும், பாதுகாப்பு அமைப்புடன் கூடிய அவை திட்டமிட்டு விசையை இழுத்தால் மட்டுமே குண்டு வெளியேறும் என்றும் தெளிவுபடுத்தப்பட்டுள்ளது. மேலும், பாதிக்கப்பட்ட பெண்ணின் தலையின் பின்புறம் ஏற்பட்ட காயம், மிக அருகில் இருந்து குறிவைத்து சுடப்பட்டதைக் காட்டுவதாக அதிகாரிகள் தெரிவித்துள்ளனர். இதன் மூலம், இது விபத்து அல்ல என்பதும் திட்டமிட்ட கொலை என்பதும் உறுதி செய்யப்பட்டுள்ளது.
விசாரணைகளின் படி, குடும்பத் தகராறு காரணமாக ஆத்திரமடைந்த அந்த அதிகாரி, மனைவியை சுட்டுக் கொன்ற பின்னர் அவசர உதவி எண்ணுக்கு தகவல் அளித்துள்ளார். மருத்துவ குழுவினர் வந்து மரணம் உறுதி செய்த பிறகு, அங்கு இருந்த மருத்துவ பணியாளர்கள் மற்றும் தனது தாயின் முன்னிலையில் அவர் தன்னைத்தானே சுட்டு உயிரை மாய்த்துக்கொண்டதாக தெரிவிக்கப்படுகிறது.
இந்தத் தம்பதியினர் இருவரும் முன்பே விவாகரத்தானவர்கள் என்றும், புதிய வாழ்க்கையை தொடங்கும் நம்பிக்கையில் இரண்டு மாதங்களுக்கு முன் மறுமணம் செய்துகொண்டதாகவும் கூறப்படுகிறது. ஆனால், குறுகிய காலத்திலேயே இந்த உறவு சோகமாக முடிவடைந்துள்ளமை அக்கம்பக்கத்தினரை அதிர்ச்சியில் ஆழ்த்தியுள்ளது.
தொடர்புடைய அதிகாரி தற்போது உயிருடன் இல்லாவிட்டாலும், சம்பவம் விபத்து அல்ல, திட்டமிட்ட கொலை என்பதை அதிகாரப்பூர்வமாக பதிவு செய்யும் நோக்கில் அவர் மீது கொலை வழக்குப் பதிவு செய்யப்பட்டுள்ளதாக அஹமதாபாத் காவல்துறை தெரிவித்துள்ளது.
முக்கிய அறிவிப்பு:
உங்களுக்கு அல்லது உங்களுக்குத் தெரிந்த எவருக்கும் மனரீதியான பாதிப்புகள் அல்லது உயிர்மாய்ப்பு தொடர்பான எண்ணங்கள் இருந்தால், தயவுசெய்து உடனடி உதவியை நாடுங்கள்.
இந்தியா – தேசிய உளநல உதவி இலக்கம்: 1926 (24 மணி நேரமும்)
சுமித்ரயோ: 011 269 2933 / 011 269 6666 (காலை 9.00 – இரவு 8.00)
இலங்கை – லைஃப்லைன்: 1333 (24 மணி நேரமும்)
