Business
oi-Prasanna Venkatesh
சவுதி அரேபியா தனது ரியல் எஸ்டேட் சந்தையை வெளிநாட்டு முதலீட்டாளர்களுக்கு அதிகாரப்பூர்வமாக திறந்துவிட்டு உள்ளது. இதற்காக ‘சவுதி ப்ராப்பர்டீஸ்’ (Saudi Properties) என்ற டிஜிட்டல் போர்ட்டலை அறிமுகப்படுத்தியுள்ளது. இந்த நடவடிக்கை மூலம், வெளிநாட்டவர்கள் சவுதி அரேபியாவில் சொத்து வாங்குவதை எளிதாக்கும்.
ஏற்கனவே துபாய் வெளிநாட்டு மக்களுக்கும், தொழிலதிபர்களுக்கும், பெரும் முதலீட்டாளர்களுக்கும் முக்கிய முதலீட்டு இடமாற மாறியிருக்கும் வேளையில், இதே பாதையில் தற்போது சவுதியும் இறங்கியுள்ளது. இதைவிட முக்கியமான விஷயம் என்னவென்றால் துபாயில் முதலீடு செய்ய திட்டமிடும் மக்களுக்கு சவுதி இன்னும் பாதுகாப்பான இடமாக இருக்கும். ஈரான் போரில் ஐக்கிய அரபு அமீரகத்தை காட்டிலும் சவுதி மிக குறைவாகவே பாதிக்கப்பட்டது.
இதேபோல் சவுதியில் தற்போது வெளிநாட்டு நிறுவனங்களின் எண்ணிக்கையும் அதிகரித்துள்ளது, அதிகப்படியான கார்ப்ரேட் வேலைவாய்ப்புகளும் உருவாக்கப்பட்டு வருகிறது. இதன் அடிப்படையில் முதலீட்டாளுக்கு நீண்ட கால மதிப்பு கூட்டுக்கு துபாயை காட்டிலும் சவுதி சிறந்த தேர்வாக இருக்கும் என எதிர்பார்க்கப்படுகிறது.
என்ன புதிய ஏற்பாடு?
சவுதி அரேபியாவின் ரியல் எஸ்டேட் ஜெனரல் அத்தாரிட்டி (REGA), ‘சவுதி ப்ராப்பர்டீஸ்’ என்ற ஆன்லைன் தளத்தை தொடங்கியுள்ளது. இந்த தளத்தின் மூலம் வெளிநாட்டு நபர்களும், நிறுவனங்களும் சவுதி அரேபியாவில் சொத்து வாங்குவதற்கான விண்ணப்பத்தை ஆன்லைனில் செய்யலாம். இந்த ஏற்பாடு, 2026 ஜனவரி மாதம் அமலுக்கு வந்த வெளிநாட்டு ரியல் எஸ்டேட் உரிமை சட்டத்தை செயல்படுத்தும் விதமாக கொண்டு வரப்பட்டுள்ளது.
இந்த தளத்தில் ஒரு Buyer-ன் தகுதி சரிபார்ப்பு, விண்ணப்ப சமர்ப்பிப்பு, ஸ்டேட்டஸ் கண்காணிப்பு உள்ளிட்ட அனைத்து பணிகளும் ஆன்லைனில் முடிக்க முடியும். மேலும், அங்கீகரிக்கப்பட்ட முதலீட்டு வாய்ப்புகளையும் இங்கே பார்க்கலாம்.
யார் சொத்து வாங்கலாம்?
சவுதி அரேபியாவில் வெளிநாட்டு நபர்கள், நிறுவனங்கள் மற்றும் பிற அமைப்புகள் எவ்விதமான தடையும் இன்றி சொத்து வாங்கலாம். இதற்கு முன் இருந்த கட்டுப்பாடுகள் தளர்த்தப்பட்டுள்ளன. இந்த புதிய சட்டம், வெளிநாட்டு முதலீட்டாளர்கள் சவுதி அரேபியாவில் சொத்து வாங்குவதை எளிதாக்கியுள்ளது.
சவுதி அரேபியாவில் வெளிநாட்டு குடியுரிமை அனுமதி (Iqama) பெற்றவர்கள், தங்கள் Iqama எண்ணை பயன்படுத்தி நேரடியாக விண்ணப்பிக்கலாம். அவர்களின் தகுதி அரசு தரவுத்தளங்களுடன் தானாக சரிபார்க்கப்படும்.
சவுதி அரேபியாவுக்கு வெளியே வசிப்பவர்களும் சொத்து வாங்கலாம். ஆனால், அவர்கள் முதலில் சவுதி தூதரகங்கள் மூலம் டிஜிட்டல் அடையாள அட்டை பெற வேண்டும். அதன் பிறகுதான் ஆன்லைன் விண்ணப்பத்தை சமர்ப்பிக்க முடியும்.
இந்த புதிய ஏற்பாடு, சவுதி அரேபியாவின் ‘விஷன் 2030’ திட்டத்தின் ஒரு பகுதியாகும்.
