வங்காள விரிகுடாவில் நிலைகொண்டுள்ள தாழமுக்கம் தீவிரமடைந்து வரும் நிலையில் நாட்டின் பல பகுதிகளில் கனமழையுடன் பலத்த காற்று வீசக்கூடும் என வளிமண்டலவியல் திணைக்களம் எச்சரித்துள்ளது.
நாட்டிற்கு வடகிழக்கு திசையில் வங்காள விரிகுடா கடற்பரப்பில் நிலைகொண்டிருந்த குறைந்த காற்றழுத்த தாழ்வுப் பகுதி தற்போது காற்றழுத்த தாழ்வு மண்டலமாக வலுவடைந்துள்ளதாக வளிமண்டலவியல் திணைக்களம் தெரிவித்துள்ளது.
இன்று அதிகாலை வெளியிடப்பட்ட வானிலை முன்னறிவிப்பின்படி, குறித்த தாழமுக்க அமைப்பானது அடுத்த 24 மணித்தியாலங்களில் மேலும் தீவிரமடைந்து தீவிர காற்றழுத்த தாழ்வு மண்டலமாக வலுப்பெறக்கூடும் என எதிர்பார்க்கப்படுகின்றது.
இந்த வானிலை அமைப்பினால் இலங்கைக்கு நேரடித் தாக்கம் எதுவும் ஏற்படாது என்ற போதிலும், அதனை நோக்கி ஈர்க்கப்படும் காற்று சுழற்சி காரணமாக நாட்டின் தென்மேற்குப் பகுதிகளில் நிலவும் மழையுடனான வானிலை மேலும் தொடரக்கூடும் என திணைக்களம் சுட்டிக்காட்டியுள்ளது.
இதற்கமைய மேல், சப்ரகமுவ, மத்திய மற்றும் வடமேல் மாகாணங்களிலும், காலி மற்றும் மாத்தறை மாவட்டங்களிலும் இடைக்கிடையே மழை அல்லது இடியுடன் கூடிய மழை பெய்யக்கூடும். அத்துடன் சில பகுதிகளில் சுமார் 100 மில்லிமீற்றர் அளவிலான பலத்த மழை பெய்யக்கூடும் எனவும் அறிவிக்கப்பட்டுள்ளது.
அதேவேளை ஊவா மாகாணத்திலும் மட்டக்களப்பு மற்றும் அம்பாறை மாவட்டங்களிலும் பிற்பகல் 2.00 மணிக்குப் பின்னர் ஆங்காங்கே மழை அல்லது இடியுடன் கூடிய மழை பெய்யக்கூடும். மேலும் வடமத்திய மாகாணத்திலும் மன்னார் மாவட்டத்திலும் பல தடவைகள் மழை பெய்யக்கூடும் என தெரிவிக்கப்பட்டுள்ளது.
மத்திய மலைநாட்டின் மேற்கு சரிவுப் பகுதிகளிலும் வடமத்திய, வடமேல் மாகாணங்களிலும் திருகோணமலை, அம்பாந்தோட்டை மற்றும் மாத்தளை மாவட்டங்களிலும் மணித்தியாலத்திற்கு 40 தொடக்கம் 50 கிலோமீற்றர் வேகத்தில் பலத்த காற்று வீசக்கூடும் எனவும் குறிப்பிடப்பட்டுள்ளது.
இதேவேளை, காற்றழுத்த தாழ்வு மண்டலத்தின் செல்வாக்கு காரணமாக வங்காள விரிகுடா கடற்பரப்பில் மழை மற்றும் காற்றின் வேகம் அதிகரிக்கக்கூடும் என்பதால் கடல் பிராந்தியங்கள் தொடர்பிலும் எச்சரிக்கை விடுக்கப்பட்டுள்ளது.
வட அகலக்கோடு 5 முதல் 22 வரையிலும் கிழக்கு நெடுங்கோடு 85 முதல் 100 வரையிலும் உள்ள ஆழ்கடல் பரப்புகளில் மறு அறிவித்தல் வரை கடற்றொழில் நடவடிக்கைகளிலும் கடற்பயணங்களிலும் ஈடுபடுவதைத் தவிர்க்குமாறு மீன்பிடி மற்றும் கடற்படை சமூகத்திற்கு அறிவுறுத்தப்பட்டுள்ளது.
தற்போது குறித்த கடல் பகுதிகளில் மீன்பிடி நடவடிக்கைகளில் ஈடுபட்டிருப்பவர்கள் உடனடியாக அங்கிருந்து வெளியேறி பாதுகாப்பான பகுதிகளுக்கு செல்லுமாறு வளிமண்டலவியல் திணைக்களம் கோரியுள்ளது.
அத்துடன் கன்கசன்துறை முதல் மன்னார் ஊடாக சிலாபம் வரையான மற்றும் மாத்தறை முதல் அம்பாந்தோட்டை ஊடாக பொத்துவில் வரையான கடற்பரப்புகளில் காற்றின் வேகமானது அவ்வப்போது மணித்தியாலத்திற்கு 55 தொடக்கம் 60 கிலோமீற்றர் வரை அதிகரிக்கக்கூடும்.
இதனால் குறித்த கடற்பரப்புகள் இடைக்கிடையே கொந்தளிப்பாகக் காணப்படும். புத்தளம் முதல் கொழும்பு, காலி மற்றும் மாத்தறை ஊடாக பொத்துவில் வரையான கடற்பரப்புகளில் கடல் அலைகள் 2.0 தொடக்கம் 2.5 மீற்றர் வரை உயரக்கூடும் எனவும் தெரிவிக்கப்பட்டுள்ளது.
இடியுடன் கூடிய மழை பெய்யும் வேளைகளில் தற்காலிகமாக பலத்த காற்று வீசுவதுடன் கடற்பரப்புகள் மிகவும் கொந்தளிப்பாக மாறக்கூடும் என்பதால் பொதுமக்கள் அவதானத்துடன் செயற்படுமாறு கேட்டுக்கொள்ளப்பட்டுள்ளனர்.
