Cricket
oi-Yogeshwaran Moorthi
லக்னோ: இந்திய டி20 அணியின் கேப்டன் ஸ்ரேயாஸ் ஐயருக்கு லக்னோவின் ஏகானா மைதானம் ராசியான மைதானமாக அமைந்துள்ளது. இந்த மைதானத்தில் 5 டி20 போட்டிகளில் விளையாடியுள்ள ஸ்ரேயாஸ் ஐயர், 2 சதங்கள், 2 அரைசதங்கள் உட்பட 335 ரன்களை விளாசி வியப்பை ஏற்படுத்தி இருக்கிறார்.
வெஸ்ட் இண்டீஸ் அணிக்கு எதிரான முதல் டி20 போட்டியில் இந்திய அணி 8 விக்கெட்டுகள் வித்தியாசத்தில் அபார வெற்றியை பெற்றுள்ளது. வெஸ்ட் இண்டீஸ் அணி நிர்ணயித்த 172 ரன்கள் என்ற இலக்கை வெறும் 14.4 ஓவர்களில் இந்திய அணி சேஸ் செய்து மிரள வைத்துள்ளது. சிறப்பாக ஆடிய ஸ்ரேயாஸ் ஐயர் 43 பந்துகளில் 6 சிக்ஸ், 10 பவுண்டரி உட்பட 102 ரன்களை விளாசி ஆட்டநாயகன் விருதை தட்டிச் சென்றுள்ளார்.
இந்தப் போட்டிக்கு முன் 10 இன்னிங்ஸாக ஸ்ரேயாஸ் ஐயர் ஒரு அரைசதம் கூட அடிக்கவில்லை. ஜிம்பாப்வே, ஆஃப்கானிஸ்தான், ஏசியன் கேம்ஸ் என்று அத்தனை போட்டிகளிலும் ஸ்ரேயாஸ் ஐயர் சொதப்பினார். இதனால் ஸ்ரேயாஸ் ஐயர் டி20 கிரிக்கெட்டில் ஒருநாள் போட்டிக்கான இன்னிங்ஸை ஆடுவதாக கடுமையான விமர்சனங்கள் எழுந்தன.
இந்த நிலையில் ஸ்ரேயாஸ் ஐயர் மரண மாஸ் கம்பேக்கை பேட்டிங் மூலமாக நிகழ்த்தி இருக்கிறார். இன்றைய ஆட்டத்தில் முதல் 50 ரன்களை 28 பந்துகளில் விளாசிய ஸ்ரேயாஸ் ஐயர், அடுத்த 14 பந்துகளில் அரைசதத்தில் இருந்து சதத்தை எட்டினார். அதுமட்டுமல்லாமல் ஸ்ரேயாஸ் ஐயருக்கு ஏகானா மைதானம் ராசியான மைதானமாக பார்க்கப்படுகிறது.
ஏனென்றால் டி20 கிரிக்கெட்டில் ஏகானா மைதானத்தில் ஸ்ரேயாஸ் ஐயர் 5 போட்டிகளில் விளையாடி இருக்கிறார். 2022ல் இலங்கை அணிக்கு எதிரான போட்டியில் ஸ்ரேயாஸ் ஐயர் 28 பந்துகளில் 57 ரன்களை விளாசி நாட் அவுட் பேட்ஸ்மேனாக இருந்தார். இதன்பின் ஐபிஎல் தொடரில் லக்னோ அணிக்கு எதிரான 3 போட்டிகளில் 15 பந்துகளில் 23 ரன்கள், 30 பந்துகளில் 52 ரன்கள், 51 பந்துகளில் 101 ரன்களை விளாசி இருக்கிறார்.
இதன் மூலமாக லக்னோ மைதானத்தில் 5 இன்னிங்ஸில் விளையாடியுள்ள ஸ்ரேயாஸ் ஐயர் 335 ரன்களை விளாசி ஒரேயொரு முறை மட்டுமே ஆட்டமிழந்துள்ளார். இந்த மைதானத்தில் ஸ்ரேயாஸ் ஐயர் ஸ்ட்ரைக் ரேட் 200.59ஆகவும், மொத்தமாக 17 சிக்ஸ் மற்றும் 32 பவுண்டரிகளை விளாசி இருக்கிறார். அதேபோல் சேஸிங்கின் போது சதம் விளாசிய முதல் இந்திய அணியின் கேப்டன் என்ற சாதனையையும் படைத்துள்ளார்.
