Last Updated:
ரூ.15 லட்சம் காப்பீட்டுத் தொகையை வசூலிக்க தனது மனைவியைக் கொன்று, அதை சாலை விபத்துபோல சித்தரித்ததாக கூறப்படும் கணவர் கைது செய்யப்பட்டுள்ள சம்பவம் பரபரப்பை ஏற்படுத்தியுள்ளது.
ஜார்கண்ட் மாநிலம் ஹசாரிபாக்கில் நடந்த அதிர்ச்சியூட்டும் சம்பவம் ஒன்று வெளிச்சத்துக்கு வந்துள்ளது. ரூ.15 லட்சம் காப்பீட்டுத் தொகையை வசூலிக்க தனது மனைவியைக் கொன்று, அதை சாலை விபத்துபோல சித்தரித்ததாக கூறப்படும் கணவர் கைது செய்யப்பட்டுள்ளார். இந்த சம்பவம் அக்டோபர் 9ஆம் தேதி ஹசாரிபாக்கில் நடந்துள்ளது.
23 வயதான சேவந்தி குமாரி மற்றும் 30 வயதான முகேஷ் குமார் ஆகியோர் நான்கு மாதங்களுக்கு முன்பு திருமணம் செய்து கொண்டனர். இந்நிலையில் மூன்று மாதங்களுக்கு முன்பு சேவந்தியின் பெயரில் காப்பீடு எடுக்கப்பட்டது. இந்தப் பணத்தைப் பெறுவதற்காக முகேஷ் தனது மனைவியைக் கொன்று, பின்னர் சேவந்தி ஒரு சாலை விபத்தில் இறந்துவிட்டதாக மனைவியின் குடும்பத்தினர் மற்றும் உறவினர்களிடம் தெரிவித்துள்ளார்.
இருப்பினும், சேவந்தியின் தந்தை மகாவீர் மேத்தா இதை நம்பவில்லை, இதனையடுத்து போலீசில் புகார் அளித்துள்ளார். அவர் தனது மருமகன் மற்றும் மகள் பெயரில் ரூ.15 லட்சத்திற்கான காப்பீட்டுக் கொள்கையை எடுத்துள்ளதாக அதிகாரிகளிடம் தெரிவித்தார். மனைவியின் இறுதிச் சடங்கில் கணவர் கலந்து கொள்ளாததும் சந்தேகங்களை எழுப்பியது.
மகாவீர் மேத்தாவின் புகாரின் அடிப்படையில், போலீசார் வழக்குப்பதிவு செய்து விசாரணையைத் தொடங்கினர். மருத்துவ பரிசோதனையில் சேவந்தியின் உடலில் மிகக் குறைந்த காயங்களே இருந்தன என்றும், அது சாலை விபத்து அல்ல என்றும் தெரியவந்தது. இது முகேஷ் மீதான சந்தேகத்தை வலுப்படுத்தியது. தீவிர விசாரணையின்போது, காப்பீட்டுத் தொகையை வசூலிப்பதற்காக தனது மனைவியின் கழுத்தை நெரித்து கொன்றதாக முகேஷ் ஒப்புக்கொண்டார். தனது மனைவியைக் கொன்ற பிறகு, முகேஷ் ஒரு போலியான விபத்தை உருவாக்கியதும் தெரியவந்துள்ளது.
முகேஷின் வாக்குமூலங்களில் இருந்த முரண்பாடுகளும், அவரது மனைவியின் மரணத்திற்குப் பிறகு இறுதிச் சடங்கில் கலந்து கொள்ளாததும் அவர் மீதான சந்தேகத்தை ஏற்படுத்தியுள்ளதாக மூத்த காவல்துறை அதிகாரி அஜித் குமார் விமல் தெரிவித்துள்ளார். இதனையடுத்து முகேஷ் கைது செய்யப்பட்டு உள்ளூர் நீதிமன்றத்தில் ஆஜர்படுத்தப்பட்டார். அவர் தற்போது நீதிமன்றக் காவலில் உள்ளார்.
தகவலின்படி, அக்டோபர் 9ஆம் தேதி இரவு, வயிற்று வலிக்காக தனது மனைவியை மருத்துவமனைக்கு அழைத்து செல்லும்போது, தலைக்கவசத்தால் அடித்து, பின்னர் கழுத்தை நெரித்து கொலை செய்துள்ளார். இதனையடுத்து பைக்கையும், தன்னையும் சேதப்படுத்திக் கொண்ட பிறகு, மனைவியின் உடலை சாலையில் விட்டுச் சென்றதாக குற்றம்சாட்டப்பட்டவர் தெரிவித்ததாக போலீசார் தெரிவித்தனர். விபத்தில் பைக்கிற்கு எந்த சேதமும் ஏற்படவில்லை என்றும், அந்த இளைஞரின் உடம்பில் காயங்கள் கூட சிறியவை என்றும் அந்த அதிகாரி கூறினார்.
இதுபோன்ற சம்பவங்கள் நடப்பது முதன்முறை அல்ல. உத்தரப்பிரதேசத்திலும் இதைப்போன்ற ஒரு சம்பவம் பதிவாகியுள்ளது. அதில், ரூ.50 கோடி மதிப்புள்ள காப்பீட்டு சலுகைகளைப் பெறுவதற்காக ஒரு நபர் தனது முதல் மனைவி, தந்தை மற்றும் தாயைக் கொன்றார். இந்த சம்பவத்தை அடுத்து போலீசார் நடத்திய விசாரணையில் அவர் கைது செய்யப்பட்டார்.
October 15, 2025 7:48 PM IST
