“ராமரை இழிவுபடுத்திய ராகுல் காந்தி…” – பாஜக பரபரப்பு குற்றச்சாட்டு

மக்களவை எதிர்க்கட்சித் தலைவரும் காங்கிரஸ் மூத்த தலைவருமான ராகுல் காந்தி அமெரிக்காவில் நிகழ்ச்சி ஒன்றில் பங்கேற்றார். அப்போது ராமரும் ஒரு புராண நம்பிக்கைதான் என அவர் பேசியதாக, வீடியோ ஒன்று இணையத்தில் பரவி வருகிறது.

ராகுல் காந்தி பேசியது என்ன?

அந்த வீடியோவில் நெறியாளர் “இந்து தேசியவாத சகாப்தத்தில் அனைத்து சமூகங்களையும் உள்ளடக்கிய ஒரு மதச்சார்பற்ற அரசியலை எவ்வாறு வடிவமைப்பது?” என்ற கேள்வி எழுப்புகிறார். அதற்கு பதிலளித்து பேசிய ராகுல் காந்தி “ஸ்ரீராமரைப் போன்ற நமது புராணக் கதாபாத்திரங்கள் அனைவரும் மன்னிக்கும் குணம் கொண்டவர்களாகவும், இரக்கமுள்ளவர்களாகவும் இருந்தனர். பாஜகவின் இந்து மதக் கருத்து ஒரு இந்து கருத்தாக நான் நினைக்கவில்லை. இந்து மதக் கருத்து பன்முகத்தன்மை கொண்டது, அனைவரையும் உள்ளடக்கியது, சகிப்புத்தன்மை கொண்டது மற்றும் அன்பானது” என்று அவர் கூறினார்.

தொடர்ந்து பேசுகையில் பாஜகவை ஒரு “விளிம்பு குழு” என்று அழைத்தார், மேலும் பாஜகவின் இந்துத்துவா கருத்து இந்திய சமூக சீர்திருத்தவாதிகள் மற்றும் காந்திஜி போன்ற அரசியல் சிந்தனையாளர்களின் கொள்கைகளுக்கு எதிரானது என்றும் ராகுல் விமர்சித்தார்.

ராகுல் காந்தியின் இந்த எட்டு வினாடிகள் கொண்ட வீடியோ கிளிப் சமூக ஊடகங்களில் வைரலாகி, பாஜக தலைவர்களிடமிருந்து கடுமையான விமர்சனங்களைப் பெற்றது. இந்நிலையில் இவ்விவகாரம் தொடர்பாக பாஜக தலைவர்கள், ராகுல் காந்திக்கு கடும் கண்டனம் தெரிவித்து வருகின்றனர்.