ராகுல் காந்திக்கு அருண் ஜெட்லி மிரட்டல் விடுத்தாரா? வேளாண் சட்டங்கள் அறிமுகமும் முன்னாள் அமைச்சரின் காலமும்! | இந்தியா

டெல்லியில் காங்கிரஸ் கட்சியின் வருடாந்திர சட்ட மாநாடு நடைபெற்றுவருகிறது. இதில், நாடாளுமன்ற எதிர்க்கட்சித் தலைவரும், காங்கிரஸ் கட்சியின் முன்னாள் தலைவருமான ராகுல் காந்தி பங்கேற்று பேசினார். அப்போது அவர், “தேர்தல் ஆணையம் என்ற அமைப்பு இல்லை என்பதை முழு நாட்டிற்கும் காட்டும் அளவுக்கு எங்களிடம் ஆதாரம் உள்ளது. இந்த ஆதாரத்தைக் கண்டுபிடிக்க நாங்கள் 6 மாதங்கள் இடைவிடாமல் உழைத்தோம். துளிகூட சந்தேகம் இல்லாமல், மக்களவைத் தேர்தல் எப்படி திருடப்பட்டது என்பதை நீங்கள் பார்ப்பீர்கள். நாடாளுமன்றத் தேர்தலில் எப்படி மோசடி நடந்தது என்பதை விரைவில் உங்களுக்கு நிரூபிக்க இருக்கிறோம்” என தேர்தல் ஆணையம் குறித்து பேசினார்.

தொடர்ந்து பேசிய அவர், “நான் வேளாண் சட்டத்தை எதிர்த்து போராடியபோது, ”அரசுக்கு எதிராகவும், வேளாண் சட்டத்திற்கு எதிராகவும் நீங்கள் போராட்டத்தை முன்னெடுத்தால், நாங்கள் உங்களுக்கு எதிராக செயல்பட வேண்டி வரும்” என அருண் ஜெட்லி எனக்கு மிரட்டல் விடுத்தார். அப்போது நான் அவரிடம், “நீங்கள் யாரிடம் பேசுகிறீர்கள் என்பது உங்களுக்கு தெரியவில்லை என நினைக்கிறேன்” என அவருக்கு பதில் அளித்தேன்” என பேசியிருந்தார்.

இவரது பேச்சுக்கு மறைந்த முன்னாள் மத்திய அமைச்சர் அருண் ஜெட்லியின் மகன், ரோஹன் ஜெட்லி மறுப்பு தெரிவித்து, 2019ல் மறைந்த தன் தந்தை எப்படி 2020ல் கொண்டுவரப்பட்ட வேளாண் சட்டம் குறித்து ராகுல் காந்திக்கு மிரட்டல் விடமுடியும் எனத் தெரிவித்துள்ளார்.

இது குறித்து அவர் தனது எக்ஸ் பக்கத்தில், “வேளாண் சட்டம் தொடர்பாக எனது தந்தை, அவருக்கு மிரட்டல் விடுத்ததாக ராகுல் காந்தி தெரிவித்துள்ளார். அவருக்கு ஒரு விஷயத்தை ஞாபகப்படுத்த விரும்புகிறேன்.

எனது தந்தை 2019ல் இயற்கை எய்தினார். வேளாண் சட்டங்கள் 2020ஆம் ஆண்டு அறிமுகம் செய்யப்பட்டது. இதைவிட முக்கியமான விஷயம், மாற்று கருத்து கொண்டவர்களை மிரட்டும் குணம் எனது தந்தைக்கு கிடையாது. எப்போதும் ஒருமித்த கருத்தை உருவாக்குவதில் நம்பிக்கை கொண்ட அவர் ஒரு தீவிர ஜனநாயகவாதி. என் தந்தை வெளிப்படையான, சுதந்திரமான விவாதத்திற்கு எப்போதும் அழைப்புவிடுப்பார்” எனத் தெரிவித்துள்ளார்.