யாழ்ப்பாண மாவட்ட நீதிபதி பெருமாள் சிவகுமார் உள்ளிட்ட மூவரைப் புதிய மேல் நீதிமன்ற நீதிபதிகளாக ஜனாதிபதி அநுர குமார திசாநாயக்க நியமித்துள்ளார்.
இலங்கையின் புதிய மேல் நீதிமன்ற நீதிபதிகளாக மூவரை ஜனாதிபதி அநுரகுமார திசாநாயக்க நியமித்துள்ளார். இதற்கான உத்தியோகபூர்வ நியமனக் கடிதங்கள் ஜனாதிபதி செயலகத்தில் வைத்து ஜனாதிபதியால் இன்று புதன்கிழமை (23) காலை வழங்கி வைக்கப்பட்டன.
யாழ்ப்பாண மாவட்ட நீதிபதியாகக் கடமையாற்றும் நீதிச் சேவையின் விசேட தர அதிகாரியான பெருமாள் சிவகுமார், நீதிச் சேவை ஆணைக்குழுவின் சிரேஷ்ட உதவிச் செயலாளரும் நீதிச் சேவையின் விசேட தர அதிகாரியுமான ஆனந்தி கனகரத்தினம் மற்றும் கொழும்பு மாவட்ட நீதிபதியும் நீதிச் சேவையின் விசேட தர அதிகாரியுமான ஞானேச லலித் கண்ணங்கர ஆகியோரே இவ்வாறு புதிய மேல் நீதிமன்ற நீதிபதிகளாகப் பதவி உயர்த்தப்பட்டுள்ளனர்.
ஜனாதிபதி அலுவலகத்தில் நடைபெற்ற இந்நிகழ்வில் ஜனாதிபதியின் செயலாளர் கலாநிதி நந்திக சனத் குமாநாயக்க உள்ளிட்ட முக்கிய அதிகாரிகளும் கலந்துகொண்டிருந்தனர்.
