மேட்ச் தொடங்கும் முன்னரே குஜராத் அணிக்கு ஏற்படப்போகும் நெருக்கடி.. மொத்த மைதானமும் மஞ்சளாக காட்சியளிக்க வாய்ப்பு..

43 வயதாகும் மகேந்திர சிங் தோனி ஐபிஎல் கிரிக்கெட் தொடரில் தற்போது சென்னை அணியின் கேப்டனாக பொறுப்பில் உள்ளார். இந்த சீசன் சென்னை அணிக்கு மிகவும் சுமாரானதாகவே அமைந்தது. இதுவரை 13 போட்டிகளில் விளையாடியுள்ள சென்னை சூப்பர் கிங்ஸ் 3 போட்டிகளில் மட்டுமே வெற்றி பெற்று 6 புள்ளிகள் உடன் கடைசி இடமான பத்தாவது இடத்தில் இருக்கிறது.

இந்த நிலையில் லீக் போட்டிகளின் கடைசி மேட்ச்சாக சென்னை அணி இன்று குஜராத் டைட்டன்ஸ் அணியை அதன் சொந்த மைதானமான அகமதாபாத் நரேந்திர மோடி மைதானத்தில் இன்று எதிர்கொள்கிறது. இதற்கிடையே இன்றைய ஆட்டத்துடன் தோனி ஐ.பி. எல் தொடரிலிருந்து விடை பெறுவார் என்று இன்று காலை முதல் சமூக வலைதளங்களில் தகவல்கள் பரவியுள்ளன.

ஆனால் ஓய்வு குறித்து சென்னை சூப்பர் கிங்ஸ் நிர்வாகத்திடம் தோனி எந்த தகவலும் தெரிவிக்கவில்லை என்று கூறப்படுகிறது. இந்நிலையில் தோனியின் கடைசி மேட்ச் இன்றைய ஆட்டம் தான் என்று கூறியுள்ள முன்னாள் கிரிக்கெட் வீரரும் விமர்சகருமான முகமது கைஃப், ரசிகர்கள் இன்று மஞ்சள் நிற ஜெர்சி அணிந்து வந்து தோனிக்கு அன்பை வெளிப்படுத்த வேண்டும் என்று கேட்டுக் கொண்டுள்ளார்.

அதனால் குஜராத் அணியின் ரசிகர்களாக இருந்தாலும் இன்றைக்கு அவர்கள் மஞ்சள் ஜெர்சியில் விளையாட்டை காண்பதற்கு அதிக வாய்ப்புகள் உள்ளன. அந்த வகையில் போட்டி நடைபெறும் அகமதாபாத் மைதானம் மஞ்சள் வண்ணத்தால் நிறைந்திருக்கும் என்று எதிர்பார்க்கப்படுகிறது.

இது மனதளவில் குஜராத் டைட்டன்ஸ் அணிக்கு நெருக்கடியை ஏற்படுத்தலாம். இன்றைய ஆட்டத்தில் வெற்றி பெற்றால் குஜராத் அணி ஐபிஎல் தரவரிசையில் டாப் 2 இடங்களில் தனது ஆட்டத்தை நிறைவு செய்யும். இதன் மூலம் அந்த அணிக்கு இறுதிப்போட்டியில் விளையாடுவதற்கு பிளே ஆப் சுற்றின் போது 2 வாய்ப்புகள் கிடைக்கும் என்பது கவனிக்கத்தக்கது.