மும்பை: முகேஷ் அம்பானி 122 பில்லியன் டாலர் (ரூ.10 லட்சம் கோடி) சொத்துமதிப்பைக் கொண்டு ஆசியாவின் மிகப் பெரிய பணக்காரராகவும் உலக கோடீஸ்வரர்கள் பட்டியலில் 11-வது இடத்திலும் உள்ளார்.
சமீபத்தில் முகேஷ் அம்பானியின் மகன் ஆனந்த் அம்பானியின் திருமணம் மிகப் பிரம்மாண்டமாக நடந்து முடிந்தது. திருமணச் செலவு ரூ.5,000 கோடி என்று கூறப்படுகிறது. அம்பானியின் வீட்டுச் சமையல்காரர்கள், காவல் ஆட்கள், வீட்டு பராமரிப்பு ஊழியர்கள் என அவரது வீட்டில் பணிபுரியும் ஊழியர்களுக்கு கணிசமான சம்பளமும், பல்வேறு வசதிகளும் வழங்கப்படுகின்றன.
குறிப்பாக, கார் ஓட்டுநர்களுக்கு ஆண்டுக்கு ரூ.24 லட்சம் சம்பளமாக வழங்கப்படுவதாக 2017-ம் ஆண்டு வெளியான வீடியோ ஒன்றில் தெரிவிக்கப்பட்டிருந்தது. அதாவது, ஓட்டுநர்களுக்கு மாதம் ரூ.2 லட்சம் வழங்கப்படுகிறது. இது பல தனியார் நிறுவனங்களில் உயர் பொறுப்பில் இருக்கும் அதிகாரிகளின் சம்பளத்தைவிட அதிகம் ஆகும்.
சவாலான நேரங்களிலும், மிகப் பாதுகாப்பாக வாகனத்தை ஓட்டுவதற்கு பயிற்சி வழங்கப்பட்டே அவர்கள் பணியில் நியமிக்கப்படுகின்றனர்.
அம்பானி குடும்பத்தினர் பயணிக்கும் கார்களில் பலத்த பாதுகாப்புக்கு முக்கியத்துவம் அளிக்கப்படுகிறது. அம்பானியின் வாகனங்கள் அனைத்தும் குண்டு துளைக்காதவை என்பது குறிப்பிடத்தக்கது.
