திருமணங்களில் பெண் தோழிகளாகவோ மாப்பிள்ளைத் தோழர்களாகவோ சிறு பிள்ளைகள் வருவதைப் பார்த்திருக்கலாம்… செல்லப்பிராணிகளைக்கூட பார்த்திருக்கலாம்… இங்கிலாந்தில் நடைபெற்ற ஒரு திருமணத்தில் மாப்பிள்ளைத் தோழனாகப் பெங்குவின் தோன்றியது.
Jk.electrical எனும் Tiktok கணக்கில் பகிரப்பட்ட காணொளியில் பெங்குவினைப் பார்க்கமுடிகிறது. கழுத்துப் பட்டை (Bow tie) அணிந்த பெங்குவின் மாப்பிள்ளையுடன் திருமண இடத்துக்குச் செல்கிறது. கழுத்துப் பட்டையில் இரண்டு மோதிரங்கள் தொங்கவைக்கப்பட்டிருந்தன.
மணமக்கள் மாற்றிக்கொள்ளும் மோதிரங்களை எடுத்துவரும் பொறுப்பு அதற்கு இருந்ததாக மாப்பிள்ளை Tiktokஇல் சொன்னார். மனைவிக்குப் பெங்குவின்கள் என்றால் மிகவும் பிடிக்கும்… திருமணத்தில் அவருக்கு எப்படியாவது இன்ப அதிர்ச்சி தரவேண்டும் என்று எண்ணிய மாப்பிள்ளை ரகசியமாக அதைச் செய்தார்.
திருமணங்களுக்கு விலங்குகளை வாடகைக்கு விடும் நிறுவனத்தைத் தொடர்புகொண்டார். மோதிரத்தை ஏந்திவந்த பெங்குவினையும் சேர்த்து மாப்பிள்ளை 4 பெங்குவின்களை வாடகைக்கு எடுத்தார். பெங்குவினைச் சற்றும் எதிர்பார்க்காத மணப்பெண் ஆனந்தக் கண்ணீர் வடித்ததாக People சஞ்சிகை சொன்னது. அனைவருக்கும் மறக்கமுடியாத அனுபவம் கிடைத்ததாகத் தம்பதி கூறினர்.
