Last Updated:
இந்திய அணி 7.4 ஓவர்களில் 5 விக்கெட் இழப்புக்கு 118 ரன்கள் எடுத்திருந்தபோது மழை மீண்டும் பெய்யத் தொடங்கியது.
தொடர் மழை காரணமாக இந்தியா மற்றும் வெஸ்ட் இண்டீஸ் இடையிலான 5 ஆவது மற்றும் கடைசி டி20 போட்டி கைவிடப்பட்டதாக அறிவிக்கப்பட்டுள்ளது. இதனால் 5 போட்டிகள் கொண்ட இந்த தொடர் 2-2 என்ற கணக்கில் சமனில் முடிந்துள்ளது.
இந்தியாவில் சுற்றுப் பயணம் மேற்கொண்ட வெஸ்ட் இண்டிஸ் கிரிக்கெட் அணி 3 போட்டிகள் கொண்ட ஒரு நாள் கிரிக்கெட் தொடரை 1-2 என்ற கணக்கில் இழந்தது. அதனை தொடர்ந்து ஐந்து போட்டிகள் கொண்ட 20 ஓவர் கிரிக்கெட் போட்டி நடைபெற்றது. இதில் 4 ஆட்டங்கள் முடிந்திருந்த நிலையில் இந்தியாவும் வெஸ்ட் இண்டீஸ் அணியும் தலா 2 போட்டிகளில் வெற்றி பெற்று சம நிலையில் இருந்தன.
இதனால் தொடரை வெல்லும் அணியை தீர்மானிக்கும் 5 ஆவது மற்றும் கடைசி டி20 கிரிக்கெட் போட்டி பெங்களூருவில் நடைபெற்றது. பெங்களூருவில் பெய்த தொடர் மழை காரணமாக ஆட்டம் தொடங்குவது தாமதம் ஆனது.
அதை தொடர்ந்து போட்டி 9 ஓவர்கள் கொண்டதாக மாற்றி அமைக்கப்பட்டு டாஸ் போடப்பட்டது. இதில் வெற்றி பெற்ற வெஸ்ட் இண்டீஸ் அணி பவுலிங்கை தேர்வு செய்தது.
தொடக்க வீரராக களம் இறங்கிய அபிஷேக் சர்மா 6 ரன்னில் ஆட்டமிழந்தார். மற்றொரு தொடக்க வீரர் சஞ்சு சாம்சன் 7 பந்துகளில் 1 சிக்சர் 2 பவுண்டரியுடன் 16 ரன்கள் எடுத்து வெளியேறினார். இஷான் கிஷ 10 பந்துகளில் 2 சிக்சர் 3 பவுண்டரியுடன் 30 ரன்கள் எடுத்தார்.
ஷ்ரேயாஸ் ஐயர் 22 ரன்களும், நமன் திர் 24 ரன்களும் எடுத்தனர். இந்திய அணி 7.4 ஓவர்களில் 5 விக்கெட் இழப்புக்கு 118 ரன்கள் எடுத்திருந்தபோது மழை மீண்டும் பெய்யத் தொடங்கியது. இதையடுத்து மைதானத்தை பார்வையிட்ட நடுவர்கள் போட்டி கைவிடப்பட்டதாக அறிவித்தனர்.
இதனால் 5 போட்டிகள் கொண்ட டி20 கிரிக்கெட் தொடர் 2-2 என்ற கணக்கில் சமனில் முடிந்துள்ளது.
