இலங்கையில் கடந்த ஒரு வருடத்தில் முன்னெடுக்கப்பட்ட போதைப்பொருள் சுற்றிவளைப்புகளில் 8 முதல் 14 வயதுக்குட்பட்ட சிறுவர்கள் உட்பட 9,105 பேர் கைது செய்யப்பட்டுள்ளதாக பொலிஸார் தெரிவித்துள்ளனர்.
கடந்த 2025 ஆம் ஆண்டு ஒக்டோபர் 30 ஆம் திகதி முதல் இதுவரையான காலப்பகுதியில் நாடு முழுவதும் முன்னெடுக்கப்பட்ட விசேட போதைப்பொருள் ஒழிப்பு நடவடிக்கைகளின் போது, ஒன்பதாயிரத்திற்கும் அதிகமான சிறுவர்களும் இளைஞர்களும் கைது செய்யப்பட்டுள்ளதாக இலங்கை பொலிஸார் தெரிவித்துள்ளனர்.
இவ்வாறு கைது செய்யப்பட்டவர்களில் 8 முதல் 14 வயதுக்கு இடைப்பட்ட சிறுவர்களும் அடங்குவது மிகுந்த கவலையளிக்கும் விடயம் என பொலிஸ் ஊடகப் பேச்சாளர் உதவிப் பொலிஸ் அத்தியட்சகர் எஃப். யூ. வூட்லர் சுட்டிக்காட்டியுள்ளார்.
சர்வதேச சிறுவர் தினத்தை நினைவுகூரும் இத்தருணத்தில், கடந்த 2025 ஒக்டோபர் 30 ஆம் திகதி முதல் நேற்று வரையான ஒரு வருட காலத்திற்குள் பல்வேறு போதைப்பொருள் குற்றச்சாட்டுகளுடன் தொடர்புடைய 8 முதல் 21 வயதுக்குட்பட்ட 9,105 சிறுவர்களும் இளைஞர்களும் கைது செய்யப்பட்டுள்ளதாக அவர் குறிப்பிட்டுள்ளார்.
கைது செய்யப்பட்டவர்களில் 8,932 ஆண் இளைஞர்களும், 173 இளம் பெண்களும் அடங்குவதாகவும், மேலும் 8 முதல் 14 வயதுக்கு இடைப்பட்ட 11 சிறுவர்கள் பொலிஸ் காவலில் எடுக்கப்பட்டுள்ளதாகவும் பொலிஸ் ஊடகப் பேச்சாளர் உதவிப் பொலிஸ் அத்தியட்சகர் எஃப். யூ. வூட்லர் மேலும் தெரிவித்தார்.
