பொலிஸாரின் உத்தியோகபூர்வ நடவடிக்கைகளை வலுப்படுத்தும் நோக்கில், 200 ஒற்றை அறை வாகனங்களைக் கொள்வனவு செய்வதற்கு அமைச்சரவை அனுமதி வழங்கியுள்ளது.
உள்நாட்டுச் சந்தையிலிருந்து இறக்குமதி செய்யப்பட்ட வாகனங்களைக் கொள்வனவு செய்வதற்கான இந்தத் தீர்மானம், 2026 பெப்ரவரி 23 ஆம் திகதி நடைபெற்ற அமைச்சரவைக் கூட்டத்தில் எடுக்கப்பட்டதாகத் தெரிவிக்கப்பட்டுள்ளது.
குறித்த கொள்வனவு நடவடிக்கைக்காக தேசிய போட்டி விலைமனுக் கோரல் நடைமுறையின் கீழ் விலைமனுக்கள் கோரப்பட்டதாகவும், உள்நாட்டு விநியோகஸ்தர்களிடமிருந்து மொத்தம் ஏழு விலைமனுக்கள் கிடைத்தன எனவும் அமைச்சரவைப் பேச்சாளர் அமைச்சர் நளிந்த ஜயதிஸ்ஸ தெரிவித்துள்ளார்.
உயர்மட்ட கொள்வனவுக் குழுவினால் மேற்கொள்ளப்பட்ட விரிவான மதிப்பீட்டின் பின்னர், தகுதிவாய்ந்த குறைந்த விலைமனுதாரராக டீசல் அன்ட் மோட்டார் எஞ்சினியரிங் பி.எல்.சி. நிறுவனம் தெரிவு செய்யப்பட்டுள்ளதாக அவர் குறிப்பிட்டுள்ளார்.
இந்தக் கொள்வனவு மூலம் நாடளாவிய ரீதியில் பொலிஸாரின் உத்தியோகபூர்வ நடவடிக்கைகளை மேலும் மேம்படுத்த எதிர்பார்க்கப்படுவதாக அரசாங்கம் தெரிவித்துள்ளது. (a)
