பேய் பிடித்திருப்பதாக கூறி பெண்ணுக்கு மாந்த்ரீக பூஜை.. மந்திரவாதி செய்த அதிர்ச்சி செயல்.. அடுத்து நடந்த ஷாக்!

கர்நாடகா மாநிலம் சிவமுகா மாவட்டத்தில் உள்ள ஜம்பரகட்டா கிராமத்தில் வசித்தவர், 32 வயதான கீதா. கடந்த சில மாதங்களாக இவருக்கு உடல்நிலை கடும் மோசமடைந்து உடல் மெலிந்து உறக்கத்தை இழந்து தவித்து வந்துள்ளார். இரவில் அடிக்கடி அலறல் சத்தத்துடன் கத்தி கூச்சலிட்டு வந்துள்ளார். எங்கெங்கோ சென்று சிகிச்சை பெற்றும் அவருக்கு உடல் நிலை சரியாகவில்லை.

இதனால் கீதாவிற்கு பேய் பிடித்திருக்குமோ என்ற சந்தேகம் அவரது குடும்பத்தினரிடையே எழுந்துள்ளது. அங்குதான் பிரச்சினை விஸ்வரூபம் எடுத்துள்ளது. கீதாவை இதே ஊரில் உள்ள பெண் மந்திரவாதியிடம் அழைத்துச் சென்றுள்ளனர். அவர், கீதாவுக்கு பேய் பிடித்துள்ளது என்றும், மாந்த்ரீக பூஜை செய்து பேயை விரட்ட வேண்டும் என்றும் கூற, அவரது குடும்பத்தினர் அதற்கு சம்மதம் தெரிவித்துள்ளனர்.

இதனையடுத்து இரவில் பூஜைக்கு ஏற்பாடு செய்த பெண் மந்திரவாதி, கீதாவை மாந்திரி கட்டத்தில் அமர வைத்து தீ மூட்டி பூஜையைத் தொடங்கினார். ஒருகட்டத்தில் மந்திரத்தை முழங்கி கொண்டே விபூதி அடித்து கையில் இருந்த கம்பால் கண்மூடித்தனமாக கீதாவை அடித்துள்ளார். ஏற்கனவே உடல் நிலை பாதிக்கப்பட்டு இருந்த கீதா, மந்திரவாதியின் அடியை தாங்க முடியாமல் கத்தி கதறியுள்ளார்.

ஒரு கட்டத்தில் கீதா, மயங்கி விழுந்து சுயநினைவை இழந்தார். அதை பார்த்து அதிர்ச்சி அடைந்த குடும்பத்தினர், கீதாவை மீட்டு உடனே மருத்துவமனைக்குத் தூக்கி சென்றனர். அங்கு தீவிர சிகிச்சை அளிக்கப்பட்டு வந்த நிலையில் சிகிச்சை பலனின்றி கீதா பரிதாபமாக உயிரிழந்தார். இச்சம்பவத்தால் ஆத்திரம் அடைந்த ஊர் மக்கள், பெண் மந்திரவாதி குறித்து ஹொன்னுார் காவல் நிலையத்துக்குத் தகவல் கொடுத்தனர்.