கோத்தா பாரு: இரண்டு வகையான போதைப்பொருட்கள் சோதனையில் பாசிட்டிவ் என வந்த ஐந்து மாத பெண் குழந்தையின் பெற்றோரால் அக்குழந்தையைப் பராமரிக்க இயலாது எனத் தெரியவந்தால், கிளந்தான் சமூக நலத்துறை (JKM) அக்குழந்தைக்கு பொறுப்பேற்கும். அக்குழந்தையைத் துறை சார்ந்த ஒரு நிறுவனத்தில் சேர்ப்பதைக் கருத்தில் கொள்வதற்கு முன்பு, குழந்தையைப் பராமரிக்க ஒரு நெருங்கிய குடும்ப உறுப்பினரை முதலில் தேடுவோம் என்று அதன் இயக்குநர் சே சம்சுசுகி சே நோர் கூறினார். ராஜா பெரெம்புவான் ஜைனப் II மருத்துவமனையின் பச்சிளங்குழந்தைகள் தீவிர சிகிச்சைப் பிரிவில் (NICU) சிகிச்சை பெற்றுவரும் அக்குழந்தையை, காவல்துறை இந்த வழக்கை விசாரிக்கும் வரை தொடர்ந்து கண்காணிப்போம் என்றும் அவர் கூறினார்.
இந்த வழக்கு இன்னும் காவல்துறை விசாரணையில் இருப்பதால், நாங்கள் குழந்தையைப் பார்க்கச் செல்லவில்லை. நாங்கள் பெற்றோரின் நிலையை மதிப்பிட வேண்டும். இருவரும் குழந்தையைப் பராமரிக்கத் தகுதியற்றவர்கள் எனில், நாங்கள் அக்குழந்தையை எங்கள் பொறுப்பில் எடுத்துக்கொள்வோம் அல்லது அவளைப் பராமரிக்க விரும்பும் ஒரு குடும்ப உறுப்பினரைத் தேடுவோம் என்று அவர் வியாழக்கிழமை (ஆகஸ்ட் 20) இங்குள்ள கோத்தா டாருல்நைம் வளாகத்தில் செய்தியாளர்களிடம் கூறினார்.
ஆகஸ்ட் 12 அன்று, மருத்துவமனையில் நடத்தப்பட்ட சிறுநீர் பரிசோதனையில் பெண் குழந்தைக்கு ஆம்பெடமைன்கள் மற்றும் பென்சோடியாசெபைன்கள் இருப்பது உறுதிசெய்யப்பட்டதைத் தொடர்ந்து, குழந்தையின் 30 வயது தாய், குழந்தை சட்டம் 2001 இன் பிரிவு 31(1)(a) மற்றும் அபாயகரமான மருந்துகள் சட்டம் 1952 இன் பிரிவு 15(1)(a) ஆகியவற்றின் கீழ் கைது செய்யப்பட்டார்.
