புதுசா கிரெடிட் கார்டு வாங்கி இருக்கீங்களா? இந்த தப்ப மட்டும் பண்ணிடாதீங்க..! | வணிகம்

சரியான கிரெடிட் கார்டை தேர்வு செய்வது என்பது ஒரு கிரெடிட் கார்டை பயன்படுத்துவதில் மிக முக்கியமான முதல் படியாக அமைகிறது. எப்பொழுதும் உங்களுடைய தேவைகள் மற்றும் செலவு செய்யும் பழக்கங்களுக்கு ஏற்ற ஒரு கார்டை தேர்வு செய்ய வேண்டும். உதாரணமாக, உங்களுக்கு பயணம் செய்வது மிகவும் பிடிக்கும் என்றால் ஏர்போர்ட் லான்ச் சேவை அல்லது ஏர் மைல் போன்ற பலன்கள் வழங்கும் ஒரு கார்டை தேர்வு செய்யுங்கள்.

எப்பொழுதும் உங்களுடைய கிரெடிட் கார்டில் இருக்கும் ஆஃபர்கள் மற்றும் டிஸ்கவுண்டுகளை கண்காணித்துக் கொண்டே இருங்கள். இந்த பலன்களை தேவையான செலவுகளுக்கு மட்டுமே நீங்கள் பயன்படுத்த வேண்டும். அதே சமயத்தில் உங்களுடைய ரிவார்டு பாயிண்டுகள் காலாவதியாகாமல் பார்த்துக் கொள்ளுங்கள். சரியான நேரத்தில் அவற்றை ரெடீம் செய்து ஷாப்பிங், டிராவல் அல்லது கிஃப்ட் வவுச்சர்களாக மாற்றிக் கொள்ளவும். ரிவார்டு பாயிண்டுகளை புத்திசாலித்தனமாக பயன்படுத்துவதன் மூலமாக ஒரு கணிசமான தொகையை உங்களால் சேமிக்க முடியும்.

உங்களுடைய கார்டை பயன்படுத்தும் போது அதில் எவ்வளவு கடன் வரம்பு இருக்கிறது என்பதை கவனிக்க ஒருபோதும் மறந்து விட வேண்டாம். உங்களுக்கு வரையறுக்கப்பட்ட தொகையை மட்டுமே நீங்கள் பயன்படுத்த வேண்டும். அதே நேரத்தில் மொத்த கிரெடிட் கார்ட் லிமிட்டை பயன்படுத்துவதும் உங்களுடைய கிரிடிட் ஸ்கோரில் எதிர்மறையான தாக்கத்தை ஏற்படுத்தலாம்.

கிரெடிட் கார்டு பில்களில் அலட்சியம் காட்டாதீர்கள். முழு தொகையையும் சரியான நேரத்தில் செலுத்துங்கள். மினிமம் டியூ பேலன்ஸ் மட்டுமே செலுத்தினால் போதுமானது என்று இருந்து விட வேண்டாம். நிலுவையில் இருக்கும் பேலன்ஸ் தொகைக்கு அதிக வட்டி விகிதம் வசூலிக்கப்படும். இது காலப்போக்கில் உங்களுடைய கடனை அதிகரிக்கும். அதே சமயத்தில் சரியான நேரத்தில் பேமெண்ட்களை செலுத்துவது உங்களுடைய கிரெடிட் ஸ்கோரை பராமரிப்பதற்கு உதவும்.

கிரெடிட் கார்டுகளுக்கு பயன்படுத்தப்படும் EMI வசதி என்பது பல நேரங்களில் பயனுள்ளதாக இருந்தாலும் சில சமயங்களில் அது உங்களை ஒரு கடன் வலைக்குள் மாட்டி விட நேரிடலாம். எனவே அதிக வட்டி விகிதங்கள், பிராசசிங் கட்டணங்கள் கொண்ட EMI -ஐ தவிர்த்து விடுங்கள். EMI ஆப்ஷனை தேர்வு செய்வதற்கு முன்பு அதற்கான கட்டணங்களை கவனமாக சரிபார்க்க வேண்டும்.